یومِ استحصالِ کشمیر: ڈیرہ مراد جمالی میں اسسٹنٹ کمشنر بہادر خان کھوسہ کی سربراہی میں یکجہتی ریلی

نصیرآباد: ڈپٹی کمشنر نصیرآباد وریندر لعل کے احکامات کی روشنی میں یومِ استحصالِ کشمیر کے موقع پر اسسٹنٹ کمشنر ڈیرہ مراد جمالی بہادر خان کھوسہ اور ایڈیشنل ڈپٹی کمشنر خلیل احمد کی سربراہی میں ایک بھرپور یکجہتی ریلی نکالی گئی، جس میں ضلعی محکموں کے افسران، اساتذہ، طلباء و طالبات، سول سوسائٹی کے نمائندوں اور مختلف شعبوں سے تعلق رکھنے والے افراد نے بڑی تعداد میں شرکت کی۔

ریلی ڈپٹی کمشنر آفس سے شروع ہو کر مقررہ راستوں سے ہوتی ہوئی اللہ ہو چوک پہنچی اور واپس ڈپٹی کمشنر آفس پہنچ کر اختتام پذیر ہوئی۔ شرکاء نے بینرز اور پلے کارڈز اٹھا رکھے تھے جن پر کشمیری عوام کے حق میں نعرے درج تھے، جبکہ «کشمیر بنے گا پاکستان» اور «پاک آرمی زندہ باد» کے فلک شگاف نعرے لگائے گئے۔

اسسٹنٹ کمشنر بہادر خان کھوسہ اور دیگر مقررین نے 5 اگست 2019 کے اقدامات کو کشمیری عوام کے بنیادی حقوق کی سنگین خلاف ورزی قرار دیتے ہوئے کہا کہ اس دن بھارت نے غیر قانونی اور غیر آئینی اقدامات کے ذریعے کشمیریوں کی خصوصی حیثیت ختم کی، جس کے بعد سے وہاں کے عوام مسلسل ظلم و جبر کا سامنا کر رہے ہیں۔

مقررین نے کہا کہ پاکستان کشمیری بھائیوں کے ساتھ کھڑا ہے اور ان کی اخلاقی، سفارتی اور سیاسی حمایت جاری رکھے گا۔ انہوں نے عالمی برادری سے مطالبہ کیا کہ وہ مقبوضہ کشمیر میں انسانی حقوق کی خلاف ورزیوں کا نوٹس لے اور کشمیری عوام کو حقِ خودارادیت دلانے میں کردار ادا کرے۔ ریلی کے اختتام پر ملک کی سلامتی، کشمیری عوام کی آزادی اور خطے میں پائیدار امن کے لیے خصوصی دعا کی گئی۔

تصویر: بشکریہ ڈی جی پی آر بلوچستان