ہرنائی: ڈسٹرکٹ مائنز الاٹمنٹ کمیٹی کا اجلاس، مجوزہ علاقوں کے مشترکہ موقع معائنے کی ہدایت

ہرنائی: ضلع ہرنائی میں کانوں (مائنز) کی قانونی اور شفاف الاٹمنٹ یقینی بنانے کے سلسلے میں ڈپٹی کمشنر ہرنائی ارشد حسین جمالی کی زیرِ صدارت ڈسٹرکٹ مائنز الاٹمنٹ کمیٹی کا اعلیٰ سطح کا جائزہ اجلاس منعقد ہوا، جس میں اسسٹنٹ ڈائریکٹر مائنز، ڈویژنل فارسٹ آفیسر (ڈی ایف او) اور کمیٹی کے دیگر سینئر ارکان نے شرکت کی۔

اجلاس میں مائنز کی الاٹمنٹ سے متعلق زیرِ التوا کیسز کی پیش رفت، درپیش مسائل اور فنی و قانونی امور کا تفصیلی جائزہ لیا گیا۔ ڈپٹی کمشنر نے محکمہ جنگلات، محکمہ مال اور پولیس کے افسران کو ہدایت کی کہ الاٹمنٹ کے لیے تجویز کردہ علاقوں کا موقع پر جا کر مشترکہ معائنہ (سائٹ وزٹ) کریں۔

انہوں نے ہدایت کی کہ الاٹمنٹ کے لیے مختص زمین کی نوعیت، حدود اور جغرافیائی موقع کا درست تعین کیا جائے، متعلقہ رقبے پر محکمہ جنگلات کے دائرۂ اختیار اور قانونی پہلوؤں کی مکمل تصدیق کرکے جامع رپورٹ مرتب کی جائے، اور تمام تصدیقی مراحل بلا تاخیر مکمل کرکے رپورٹس متعلقہ فورم پر پیش کی جائیں۔

ڈپٹی کمشنر نے محکموں کے مابین کوآرڈینیشن مزید فعال بنانے پر زور دیا تاکہ انتظامی تاخیر سے الاٹمنٹ کے معاملات تعطل کا شکار نہ ہوں۔ اجلاس کے اختتام پر عزم کیا گیا کہ ضلع میں معدنی وسائل کی الاٹمنٹ کے تمام امور سرکاری قواعد، مروجہ قوانین اور زمینی حقائق کے مطابق مکمل طور پر شفاف، غیر جانبدارانہ اور قانونی طریقے سے نمٹائے جائیں گے۔

تصویر: بشکریہ ڈی جی پی آر بلوچستان