ہرنائی میں یومِ استحصالِ کشمیر سیمینار، ڈپٹی کمشنر ارشد حسین جمالی کی صدارت

ہرنائی: یومِ استحصالِ کشمیر کی مناسبت سے ضلع ہرنائی میں ایک باوقار سیمینار منعقد ہوا، جس میں مقبوضہ جموں و کشمیر پر بھارتی تسلط، غصب شدہ حقوق اور نہتے کشمیریوں پر جاری مظالم کے خلاف شدید غم و غصے کا اظہار اور احتجاج ریکارڈ کرایا گیا۔

سیمینار کی صدارت ڈپٹی کمشنر ہرنائی ارشد حسین جمالی نے کی، جبکہ ایس پی ہرنائی انجینئر عبدالحفیظ جھکرانی، اسسٹنٹ کمشنر اسرار احمد، ڈسٹرکٹ ایجوکیشن آفیسر غلام حیدر سمیت تمام ضلعی محکموں کے سربراہان، سول سوسائٹی کے نمائندوں اور علاقائی معززین نے بڑی تعداد میں شرکت کی۔

مقررین نے 5 اگست 2019 کو بھارتی حکومت کی جانب سے آئین کے آرٹیکل 370 اور 35-A کی یکطرفہ، غیر قانونی اور غیر آئینی منسوخی پر سخت تنقید کی اور اسے عالمی قوانین کا استہزاء قرار دیا۔ ان کا کہنا تھا کہ اس اقدام کا بنیادی مقصد جموں و کشمیر کی تاریخی اور بین الاقوامی طور پر تسلیم شدہ خصوصیت کو سلب کرنا ہے۔

مقررین نے کہا کہ بھارت مقبوضہ وادی میں آبادیاتی (Demographic) تناسب تبدیل کر کے کشمیریوں کو ان کی اپنی زمین پر اقلیت میں بدلنے کی مذموم کوشش کر رہا ہے، جو اقوامِ متحدہ کی سلامتی کونسل (UNSC) کی قراردادوں کی سنگین خلاف ورزی ہے۔ انہوں نے واضح کیا کہ ان مظالم سے کشمیریوں کے جذبۂ حریت کو دبایا نہیں جا سکتا، اور پاکستان کا بچہ بچہ کشمیری بھائیوں کے ساتھ کھڑا ہے، ان کی اخلاقی، سیاسی و سفارتی حمایت اس وقت تک جاری رہے گی جب تک وہ اقوامِ متحدہ کے منشور کے مطابق حقِ خودارادیت حاصل نہیں کر لیتے۔

سیمینار کے اختتام پر کشمیری عوام سے کامل یکجہتی کا اعادہ کیا گیا اور شہدائے کشمیر کے درجات کی بلندی، وادیٔ کشمیر کی جلد آزادی، معرکۂ حق کے شہداء اور پاکستان کی سلامتی، استحکام اور خوشحالی کے لیے دعا کی گئی۔

تصویر: بشکریہ ڈی جی پی آر بلوچستان