ہرنائی میں کھلی کچہری: ڈپٹی کمشنر ارشد حسین جمالی نے عوامی مسائل پر موقع پر احکامات جاری کیے

ہرنائی: ضلعی انتظامیہ ہرنائی کی جانب سے عوامی مسائل کی براہِ راست شنوائی اور فوری تدارک کے لیے ڈپٹی کمشنر کمپلیکس ہرنائی میں کھلی کچہری کا انعقاد کیا گیا، جس کی صدارت ڈپٹی کمشنر ارشد حسین جمالی نے کی۔ اس اقدام کا مقصد شہریوں اور ضلعی انتظامیہ کے درمیان دوریاں ختم کرنا اور عوامی شکایات کا ترجیحی بنیادوں پر ازالہ کرنا تھا۔

کھلی کچہری میں سول، عسکری اور پولیس حکام نے مل کر عوامی مسائل سنے۔ اس موقع پر ایف سی ہرنائی (81 ونگ) کے کمانڈر لیفٹیننٹ کرنل ارباب علی خان، ایڈیشنل ڈپٹی کمشنر محمد سلیم ترین، ایس پی ہرنائی انجینئر عبدالحفیظ جھکرانی اور اسسٹنٹ کمشنر ہرنائی اسرار احمد شاہوانی سمیت تمام سرکاری محکموں کے افسران، سیاسی و سماجی شخصیات، قبائلی عمائدین اور مذہبی رہنما بڑی تعداد میں شریک ہوئے۔

شہریوں نے تعلیم، صحت، پینے کے صاف پانی، انفراسٹرکچر اور امن و امان سے متعلق مسائل حکام کے سامنے رکھے۔ ڈپٹی کمشنر نے مسائل توجہ سے سنے اور متعدد مسائل پر متعلقہ افسران کو موقع پر ہی احکامات جاری کیے۔ انہوں نے واضح کیا کہ عوامی خدمت میں کوئی غفلت برداشت نہیں کی جائے گی اور تمام جائز مطالبات جلد حل کیے جائیں گے۔

ڈپٹی کمشنر نے کہا کہ ضلعی انتظامیہ علاقے کی ترقی اور شہریوں کی فلاح کے لیے ہمہ وقت کوشاں ہے اور کھلی کچہریوں کا سلسلہ آئندہ بھی جاری رہے گا تاکہ گڈ گورننس کے ثمرات عام آدمی کی دہلیز تک پہنچ سکیں۔ اختتام پر سیاسی و قبائلی عمائدین نے انتظامیہ کے اس عوام دوست اقدام کو سراہا۔

تصویر: بشکریہ ڈی جی پی آر بلوچستان