ہائی کورٹ کے حکم پر کوئٹہ میں کینسل شدہ لوکل بسوں کے خلاف کریک ڈاؤن، 5 بسیں بند، 3 مالکان گرفتار

کوئٹہ: بلوچستان ہائی کورٹ کے حکم اور سیکرٹری ٹرانسپورٹ حیات کاکڑ کی ہدایات پر 5 ستمبر کو کوئٹہ شہر میں خستہ حال اور موٹر وہیکل آرڈیننس و رولز کے تحت کینسل شدہ پرمٹ پر چلنے والی لوکل بسوں کے خلاف کریک ڈاؤن کیا گیا۔

سیکرٹری ریجنل ٹرانسپورٹ اتھارٹی (آر ٹی اے) کوئٹہ نعمت اللہ ترین نے اپنے عملے، ایس پی ٹریفک صدر کوئٹہ عاصم شاہ اور ٹریفک پولیس کے ہمراہ مختلف روٹس پر کارروائی کی۔ اس دوران پانچ خستہ حال اور کینسل شدہ لوکل بسیں بند کر دی گئیں، تین بس مالکان گرفتار ہوئے اور ایک بس مالک کے خلاف ایف آئی آر درج کی گئی۔

حکام کے مطابق ان تمام بسوں کے پرمٹ خستہ حالی اور قوانین کی خلاف ورزی پر آر ٹی اے پہلے ہی منسوخ کر چکی تھی، اس کے باوجود انہیں مختلف روٹس پر غیر قانونی طور پر چلایا جا رہا تھا۔

نعمت اللہ ترین نے کہا کہ منسوخ شدہ پرمٹ اور خستہ حال گاڑیوں کو کسی صورت سڑکوں پر چلنے نہیں دیا جائے گا اور شہریوں کی جانیں خطرے میں ڈالنے والی ٹرانسپورٹ کے خلاف کارروائیاں بلاامتیاز جاری رہیں گی۔ کوئٹہ شہر کی اندرونی سڑکوں پر اب صرف 2022 ماڈل کوسٹر اور آئی ایس کو چلنے کی اجازت ہوگی۔

تصویر: بشکریہ ڈی جی پی آر بلوچستان