گورنمنٹ بوائز ڈگری کالج زیارت میں ٹیچرز ڈے کی تقریب، تقاریر، کیک کٹنگ اور ثقافتی اتن

زیارت: گورنمنٹ بوائز ڈگری کالج زیارت میں اساتذہ کی علمی، اخلاقی اور تربیتی خدمات کو خراجِ تحسین پیش کرنے کے لیے ٹیچرز ڈے کے حوالے سے پروقار تقریب منعقد ہوئی۔ تقریب کے مہمانِ خصوصی پروفیسر بلوچ خان تھے، جبکہ کالج کے پرنسپل پروفیسر نقیب اللہ کاکڑ سمیت اساتذہ اور طلبہ نے بھرپور شرکت کی۔

طلبہ نے اساتذہ سے محبت، عقیدت اور احترام کے اظہار کے لیے مختلف پروگرام پیش کیے اور اردو و انگریزی تقاریر میں اپنے اساتذہ کی محنت، رہنمائی، کردار سازی اور تعلیمی خدمات کو خراجِ تحسین پیش کیا۔ طلبہ نے اساتذہ کو تحائف بھی دیے، جبکہ "Happy Teachers Day" درج خصوصی کیک کی رونمائی ہوئی جسے اساتذہ اور طلبہ نے مل کر کاٹا۔

تقریب سے پروفیسر عبدالحمید، پروفیسر عجب خان، پروفیسر بلوچ خان اور پرنسپل پروفیسر نقیب اللہ کاکڑ نے خطاب کیا اور اساتذہ کے عظیم مقام، طلبہ کی تربیت میں ان کے کردار اور معاشرے کی تعمیر و ترقی میں استاد کی اہمیت پر روشنی ڈالی۔

آخری مرحلے میں اردو تقریری مقابلے میں نمایاں پوزیشن حاصل کرنے والے طلبہ میں انعامات تقسیم کیے گئے، جبکہ پروفیسر صاحبان کو ان کی علمی، تدریسی اور انتظامی خدمات کے اعتراف میں سووینئرز اور شیلڈز پیش کی گئیں۔ پرنسپل کی جانب سے طلبہ کے لیے چائے پارٹی کا اہتمام کیا گیا۔

تقریب کے اختتام پر ثقافتی اتن (Attan) کا مظاہرہ پیش کیا گیا جس میں طلبہ نے روایتی جوش و جذبے سے حصہ لیا۔ پروگرام کو استاد اور شاگرد کے رشتے، احترامِ استاد، تعلیمی اقدار اور مقامی ثقافت کا حسین امتزاج قرار دیا گیا، اور اس عہد کی تجدید کی گئی کہ استاد کی عزت، علم کی قدر اور تعلیم کے فروغ سے ایک بہتر معاشرہ تشکیل دیا جا سکتا ہے۔

تصویر: بشکریہ ڈی جی پی آر بلوچستان