گوادر میں ہفتہ روزہ شجرکاری مہم اور پھولوں کی نمائش کی تیاریاں، تعلیمی اداروں کے سربراہان سے ملاقاتیں

گوادر: رکن صوبائی اسمبلی گوادر مولانا ہدایت الرحمن بلوچ کی زیرِ صدارت گزشتہ روز گوادر میں ہفتہ روزہ شجرکاری مہم کے انعقاد کا اعلان کیا گیا تھا، جس کے تحت شجرکاری، پھولوں کی نمائش اور ماحولیات و شجرکاری سے متعلق آگاہی فراہم کی جائے گی۔

مہم کی تیاریوں کے سلسلے میں مولانا ہدایت الرحمن بلوچ کے معاون خصوصی وسیم صمد اور ڈپٹی کنزرویٹر جنگلات اسداللہ نے گورنمنٹ گرلز ڈگری کالج کی پرنسپل اور گورنمنٹ بوائز ہائی اسکول جدید سمیت دیگر تعلیمی اداروں کے سربراہان سے ملاقاتیں کیں اور پروگرام کے انتظامات، شجرکاری، طلبہ کی شرکت، پھولوں کی نمائش اور دیگر ضروری امور پر تبادلہ خیال کیا۔

اس موقع پر تعلیمی اداروں اور متعلقہ محکموں کے تعاون سے مہم کو مؤثر انداز میں منعقد کرنے اور گوادر میں شجرکاری، ماحولیاتی تحفظ اور شہر کی خوبصورتی کے حوالے سے عوامی شعور اجاگر کرنے پر بھی گفتگو کی گئی۔

تصویر: بشکریہ ڈی جی پی آر بلوچستان