گوادر میں اسکل ایجوکیشن ہیلتھ کیئر پروگرام کا پہلا مرحلہ مکمل: 120 طالبات کی تربیت، ڈپٹی کمشنر نے سرٹیفکیٹس دیے

گوادر: ڈپٹی کمشنر گوادر نقیب اللہ کاکڑ نے کہا ہے کہ صوبائی حکومت نوجوان نسل کو جدید دور کے تقاضوں سے ہم آہنگ کرنے اور طلبہ و طالبات کو تعلیم کے ساتھ عملی، طبی اور فنی مہارتوں سے آراستہ کرنے کی پالیسی پر عمل پیرا ہے۔ وہ محکمہ تعلیم گوادر اور ایجوکیشن سپورٹ پروگرام (ESP) کے زیرِ اہتمام ڈپٹی کمشنر آفس کے کانفرنس ہال میں اسکل ایجوکیشن ہیلتھ کیئر پروگرام کے پہلے مرحلے کی تکمیل پر منعقدہ اختتامی تقریب سے خطاب کر رہے تھے۔

انہوں نے کہا کہ اسکول کی سطح پر طالبات کو بنیادی طبی مہارتوں سے آراستہ کرنا وقت کی اہم ضرورت ہے، اور نصابی تعلیم کے ساتھ ایسی عملی تربیت نوجوانوں میں خود اعتمادی، ذمہ داری اور ہنگامی طبی حالات میں مؤثر کردار ادا کرنے کی صلاحیت پیدا کرتی ہے۔

آٹھ ماہ کا کورس، امتحان بولان یونیورسٹی لے گی

پروگرام میں طالبات کو آٹھ ماہ پر مشتمل جامع تربیتی کورس کرایا گیا جس میں ابتدائی طبی امداد (First Aid)، ایمرجنسی رسپانس، صحت و حفاظت، مریض کی بنیادی نگہداشت اور دیگر ضروری طبی مہارتیں شامل ہیں۔ تقریب میں بتایا گیا کہ تربیت مکمل ہونے کے بعد امتحان بولان یونیورسٹی آف میڈیکل اینڈ ہیلتھ سائنسز کوئٹہ کے زیرِ اہتمام لیا جائے گا اور کامیاب طالبات کو باقاعدہ سرٹیفکیٹس جاری کیے جائیں گے۔

پہلے مرحلے میں 120 طالبات کامیابی سے تربیت مکمل کر چکی ہیں جبکہ دوسرے مرحلے میں نئی طالبات کی تربیت شروع کر دی گئی ہے۔ یہ اقدام نوجوان نسل کو جدید تقاضوں کے مطابق تعلیم، ہنر اور بنیادی صحت کی مہارتوں سے آراستہ کرنے کے صوبائی حکومت کے عزم کا عملی اظہار ہے۔

تقریب سے ضلعی آفیسر تعلیم ذاہد حسین، ایجوکیشن سپورٹ پروگرام کے منیجر عادل نودزئی اور ہیڈمسٹریس بلقیس سلیمان نے بھی خطاب کیا اور پروگرام کو طالبات کی صلاحیتوں میں اضافے، صحت و حفاظت کے شعور اور معاشرے کی مؤثر خدمت کی جانب اہم قدم قرار دیا۔ آخر میں ڈپٹی کمشنر نے کورس مکمل کرنے والی طالبات میں سرٹیفکیٹس تقسیم کیے۔

تصویر: بشکریہ ڈی جی پی آر بلوچستان