کوئٹہ، نوشکی اور خضدار میں 8 مبینہ دہشت گرد ہلاک، ضیاء اللہ لانگو کا فورسز کو خراجِ تحسین

کوئٹہ: وزیر داخلہ بلوچستان میر ضیاء اللہ لانگو نے کوئٹہ، نوشکی اور خضدار میں دہشت گردوں کے خلاف سیکیورٹی فورسز کی کامیاب کارروائیوں کو خراجِ تحسین پیش کیا ہے۔ ان کے مطابق دہشت گردی کے خاتمے اور صوبے میں امن و امان کے قیام کے لیے فورسز کی بروقت اور مؤثر کارروائیاں قابلِ ستائش ہیں۔

ان کارروائیوں کے دوران بھارتی سرپرستی کے مبینہ 8 دہشت گردوں کی ہلاکت اور اسلحہ و گولہ بارود کی برآمدگی سیکیورٹی اداروں کی اہم کامیابی ہے۔

اپنے بیان میں انہوں نے کہا کہ یہ کارروائیاں سیکیورٹی فورسز کی پیشہ ورانہ صلاحیتوں، مستعدی اور مؤثر حکمت عملی کا ثبوت ہیں۔ بلوچستان میں امن و استحکام کے قیام اور عوام کے جان و مال کے تحفظ کے لیے سیکیورٹی ادارے اپنی ذمہ داریاں بھرپور انداز میں ادا کر رہے ہیں۔

پنجپائی اور خضدار

میر ضیاء اللہ لانگو نے کہا کہ کوئٹہ کے علاقے پنجپائی میں دہشت گردوں کی جانب سے سڑک پر ناکہ بندی کی کوشش کو ناکام بنانا سیکیورٹی فورسز کی بروقت کارروائی کا نتیجہ ہے۔ دہشت گرد اپنے مذموم عزائم کے ذریعے عوامی زندگی اور آمدورفت کو یرغمال نہیں بنا سکتے اور نہ ہی عوام میں خوف و ہراس پھیلانے کی کوششوں میں کامیاب ہوں گے۔

ان کا کہنا تھا کہ کوئٹہ میں دہشت گردوں کے ٹھکانوں سے اسلحہ اور گولہ بارود کی برآمدگی سیکیورٹی فورسز کی مؤثر حکمت عملی کی عکاسی کرتی ہے، جبکہ خضدار میں دہشت گردوں کے ٹھکانے سے 490 کلوگرام دھماکا خیز مواد برآمد ہونا بھی ایک اہم پیش رفت ہے۔ ایسے اقدامات دہشت گردی کے ممکنہ خطرات کی روک تھام اور شہریوں کے تحفظ کے لیے انتہائی اہمیت رکھتے ہیں۔

وزیر داخلہ بلوچستان نے کہا کہ صوبائی حکومت دہشت گردی کے مکمل خاتمے، امن و امان کی بہتری اور شہریوں کے جان و مال کے تحفظ کے لیے پرعزم ہے۔ انہوں نے اس عزم کا اعادہ کیا کہ عوام کے تحفظ اور صوبے میں پائیدار امن کے قیام کے لیے تمام متعلقہ اداروں کے ساتھ مل کر اقدامات جاری رکھے جائیں گے۔

انہوں نے سیکیورٹی فورسز کی خدمات کو سراہتے ہوئے کہا کہ بلوچستان میں امن کا قیام اور شہریوں کو محفوظ ماحول فراہم کرنا حکومت کی اولین ترجیحات میں شامل ہے۔