کمشنر کوہِ سلیمان مجیب الرحمٰن قمبرانی سے بی آئی ایس پی حکام کی ملاقات، مستحقین تک شفاف امداد پر زور

بارکھان: کمشنر کوہِ سلیمان ڈویژن مجیب الرحمٰن قمبرانی سے بینظیر انکم سپورٹ پروگرام (بی آئی ایس پی) نارتھ زون کے زونل ڈائریکٹر ڈاکٹر اکبر خان ناصر اور اسسٹنٹ ڈائریکٹر ظفر حیات نے رکھنی میں ملاقات کی۔

ملاقات میں بی آئی ایس پی کے تحت جاری مختلف پروگرامز، مستحق خاندانوں کو فراہم کی جانے والی مالی معاونت، عوام کو درپیش مسائل کے حل اور پروگرام پر مؤثر عملدرآمد کے حوالے سے تفصیلی تبادلۂ خیال کیا گیا۔

کمشنر مجیب الرحمٰن قمبرانی نے کہا کہ مستحق افراد تک حکومتی امدادی پروگرامز کے ثمرات شفاف اور مؤثر انداز میں پہنچانا ضروری ہے۔ انہوں نے متعلقہ حکام پر زور دیا کہ بی آئی ایس پی سے متعلق عوامی شکایات کے ازالے اور مستحقین کو سہولیات کی فراہمی کے لیے تمام ممکنہ اقدامات یقینی بنائے جائیں۔ ملاقات میں باہمی دلچسپی کے دیگر امور اور علاقے میں بی آئی ایس پی کی کارکردگی سے متعلق معاملات بھی زیرِ غور آئے۔

تصویر: بشکریہ ڈی جی پی آر بلوچستان