ڈی ایچ کیو ہسپتال زیارت میں ڈائیلاسز سروس کا آغاز، ڈپٹی کمشنر عبدالقدوس اچکزئی نے مشین کا افتتاح کیا

زیارت: محکمہ صحت بلوچستان کی جانب سے ڈسٹرکٹ ہیڈکوارٹر ہسپتال زیارت میں ڈائیلاسز مشین کی تنصیب مکمل کرکے باقاعدہ سروس کا آغاز کر دیا گیا ہے۔ مشین کا افتتاح ڈپٹی کمشنر زیارت عبدالقدوس اچکزئی نے کیا۔ اس موقع پر ڈی ایچ او ڈاکٹر رفیق مستوئی، ایم ایس شمس اللہ، محکمہ صحت کے افسران اور دیگر حکام بھی موجود تھے۔

یہ اقدام وزیرِ اعلیٰ بلوچستان کے وژن کے مطابق کیا گیا ہے۔ یاد رہے کہ ڈائیلاسز مشین کی فراہمی اور اس سہولت کے آغاز کے حوالے سے گزشتہ دنوں صوبائی وزیر خوراک حاجی نور محمد خان دمڑ نے بھی اس کا افتتاح کیا تھا۔

ڈپٹی کمشنر عبدالقدوس اچکزئی نے کہا کہ مقامی سطح پر ڈائیلاسز کی سہولت زیارت اور گردونواح کے گردوں کے مریضوں کے لیے اہم طبی سہولت ہے، جس سے انہیں علاج کے لیے کوئٹہ سمیت دیگر شہروں کا سفر کرنے کی ضرورت کم ہوگی۔ اس سے قبل مریضوں کو ڈائیلاسز کے لیے دور دراز علاقوں کا رخ کرنا پڑتا تھا اور سفری اخراجات، وقت اور دیگر مشکلات کا سامنا رہتا تھا۔

انہوں نے کہا کہ صحتِ عامہ کی سہولیات میں بہتری اور معیاری طبی خدمات کی فراہمی ضلعی انتظامیہ کی ترجیحات میں شامل ہے اور سرکاری ہسپتالوں میں جدید سہولیات کی فراہمی کے لیے ہر ممکن اقدامات کیے جا رہے ہیں۔ انہوں نے ہدایت کی کہ ڈائیلاسز سروس مؤثر انداز میں جاری رکھی جائے اور مریضوں کو بروقت، معیاری اور ضروری طبی سہولیات فراہم کی جائیں۔

عوامی حلقوں نے حکومتِ بلوچستان، محکمہ صحت اور ضلعی انتظامیہ زیارت کے اس اقدام کو اہم قرار دیتے ہوئے امید ظاہر کی کہ مستقبل میں بھی ضلع کے عوام کو مزید جدید اور معیاری طبی سہولیات فراہم کی جائیں گی۔

تصویر: بشکریہ ڈی جی پی آر بلوچستان