ڈیرہ مراد جمالی سے تجاوزات کے خاتمے کے لیے ڈپٹی کمشنر نصیرآباد کی تین دن کی ڈیڈ لائن

نصیرآباد: ڈپٹی کمشنر نصیرآباد وریندر لعل کی زیر صدارت شہر سے ناجائز تجاوزات کے خاتمے اور ٹریفک نظام کی بہتری کے لیے اجلاس منعقد ہوا، جس میں اسسٹنٹ کمشنر بہادر خان کھوسہ، چیف آفیسر میونسپل کارپوریشن ڈیرہ مراد جمالی، پولیس حکام اور دیگر ضلعی افسران نے شرکت کی۔

اجلاس میں ڈیرہ مراد جمالی شہر میں شہریوں کو درپیش مسائل، ٹریفک کی روانی، سڑکوں کے دونوں اطراف قائم ناجائز تجاوزات، غیر قانونی دکانوں و تھڑوں اور عوامی آمدورفت میں رکاوٹوں کا جائزہ لیا گیا۔ اس بات پر زور دیا گیا کہ مرکزی شاہراہوں اور تجارتی علاقوں میں تجاوزات کے باعث ٹریفک کا نظام متاثر ہو رہا ہے اور پیدل چلنے والوں کو بھی شدید مشکلات کا سامنا ہے۔

تین دن کی مہلت

ڈپٹی کمشنر نے ہدایت کی کہ مین روڈ کے دونوں اطراف قائم تمام تجاوزات کے خلاف بلاامتیاز کارروائی کی جائے اور کسی کو سرکاری اراضی، فٹ پاتھ یا سڑک کے اطراف قبضہ یا سامان رکھ کر راستہ روکنے کی اجازت نہیں دی جائے گی۔ انہوں نے میونسپل کارپوریشن اور ضلعی انتظامیہ کو باقاعدہ ٹیمیں تشکیل دے کر کارروائی شروع کرنے اور مسلسل نگرانی کی ہدایت کی تاکہ تجاوزات دوبارہ قائم نہ ہوں۔

وریندر لعل نے واضح کیا کہ تین دن کے اندر شہر کی مرکزی شاہراہوں اور اہم مقامات سے تجاوزات کا خاتمہ یقینی بنایا جائے اور روزانہ پیش رفت رپورٹ پیش کی جائے۔ پولیس اور میونسپل کارپوریشن کو باہمی کوآرڈینیشن یقینی بنانے اور شاہراہوں پر غیر ضروری رکاوٹوں کے خاتمے اور پارکنگ کے مناسب انتظامات پر توجہ دینے کی ہدایت بھی کی گئی۔

انہوں نے کہا کہ شہر کو صاف ستھرا، خوبصورت اور منظم بنانا ضلعی انتظامیہ کی اولین ترجیح ہے اور اس سلسلے میں کسی قسم کی غفلت برداشت نہیں کی جائے گی۔

تصویر: بشکریہ ڈی جی پی آر بلوچستان