ڈپٹی کمشنر چمن حبیب احمد بنگلزئی کی زیرِ صدارت ڈی سی سی اور ڈی ڈی سی اجلاس، امن و امان کا جائزہ

چمن: ڈپٹی کمشنر چمن حبیب احمد بنگلزئی کی زیرِ صدارت ضلع کوآرڈینیشن کمیٹی اور ڈسٹرکٹ ڈیولپمنٹ کمیٹی (DCC&DDC) کا ایک اہم مشترکہ اجلاس ڈپٹی کمشنر آفس چمن میں منعقد ہوا، جس میں ضلعی انتظامیہ، قانون نافذ کرنے والے اداروں، سیکیورٹی فورسز، محکمہ صحت، محکمہ تعلیم، بلدیاتی اداروں، مواصلات و تعمیرات، آبپاشی، پبلک ہیلتھ انجینئرنگ، پی پی ایچ آئی اور دیگر متعلقہ محکموں کے سربراہان نے شرکت کی۔

اجلاس میں ضلع چمن کی مجموعی امن و امان کی صورتحال، بین الادارہ رابطے، عوامی خدمات کی بہتری، جاری ترقیاتی منصوبوں، صحت و تعلیم کے شعبوں کی کارکردگی، صفائی ستھرائی، شہری سہولیات اور دیگر اہم انتظامی امور کا تفصیلی جائزہ لیا گیا۔

ڈپٹی کمشنر حبیب احمد بنگلزئی نے کہا کہ عوام کو بروقت اور معیاری سہولیات کی فراہمی ضلعی انتظامیہ کی اولین ترجیح ہے۔ انہوں نے تمام محکموں کو ہدایت کی کہ اپنے فرائض پوری ذمہ داری، شفافیت اور باہمی تعاون کے ساتھ انجام دیں تاکہ عوامی مسائل بروقت حل ہو سکیں۔

انہوں نے ہدایت کی کہ جاری ترقیاتی منصوبوں کی رفتار تیز کی جائے، بین المحکمہ رابطے کو مزید مؤثر بنایا جائے اور ضلع میں امن و امان برقرار رکھنے کے لیے تمام ادارے مشترکہ حکمت عملی کے تحت کام کریں۔

اجلاس کے اختتام پر مختلف محکموں کے سربراہان نے اپنے شعبوں کی کارکردگی، درپیش مسائل اور آئندہ کے لائحہ عمل پر بریفنگ دی، جبکہ ڈپٹی کمشنر نے تمام اداروں کو عوامی مفاد میں بہتر کارکردگی اور باہمی ہم آہنگی کے ساتھ فرائض انجام دینے کی ہدایت کی۔

تصویر: بشکریہ ڈی جی پی آر بلوچستان