ڈپٹی کمشنر نصیر آباد وریندر لعل کی شہریوں سے ملاقاتیں، عوامی مسائل کے حل کے لیے افسران کو ہدایات

نصیر آباد: ڈپٹی کمشنر نصیر آباد وریندر لعل سے ضلع کے مختلف علاقوں سے تعلق رکھنے والے شہریوں اور وفود نے ملاقات کی، اپنے مسائل سے تفصیلی طور پر آگاہ کیا اور بعض مسائل کے حل کے لیے تحریری درخواستیں بھی پیش کیں۔ شہریوں نے بنیادی سہولیات، عوامی خدمات اور دیگر انتظامی امور سے متعلق معاملات ڈپٹی کمشنر کے سامنے رکھے۔

ڈپٹی کمشنر نے شہریوں کے مسائل توجہ اور تحمل سے سنے اور متعلقہ امور کے بارے میں معلومات حاصل کیں۔ انہوں نے کہا کہ ضلعی انتظامیہ عوامی مسائل کے حل اور شہریوں کو ریلیف کی فراہمی کے لیے ہر ممکن اقدامات کر رہی ہے، اور جائز اور قابلِ عمل مسائل کے حل کے لیے متعلقہ محکموں سے رابطہ کر کے ضروری اقدامات کیے جائیں گے۔

انہوں نے افسران کو ہدایت کی کہ عوامی مسائل کو ترجیحی بنیادوں پر دیکھا جائے اور ضلعی انتظامیہ کے دائرہ اختیار میں آنے والے معاملات قواعد و ضوابط کے مطابق جلد حل کیے جائیں۔ وریندر لعل نے کہا کہ عوام اور انتظامیہ کے درمیان براہِ راست رابطہ مسائل کے بروقت حل میں اہم کردار ادا کرتا ہے، اس لیے شہری بلاجھجک اپنے مسائل انتظامیہ کے سامنے پیش کریں۔

تصویر: بشکریہ ڈی جی پی آر بلوچستان