ڈویژنل پبلک اسکول لورالائی میں یومِ آزادی کی رنگا رنگ تقریب، کمشنر ولی محمد بڑیچ کا طلبہ سے خطاب

لورالائی: ڈویژنل پبلک اسکول لورالائی میں پاکستان کے 79ویں یومِ آزادی کے موقع پر رنگا رنگ تقریب منعقد ہوئی، جس کے مہمانِ خصوصی کمشنر لورالائی ڈویژن ولی محمد بڑیچ تھے۔ تقریب میں ایڈیشنل ڈپٹی کمشنر اعجاز احمد جعفر، فرزند ایم پی اے افضل خان اوتمانخیل، اسسٹنٹ کمشنر ندیم اکرم، ڈسٹرکٹ ایجوکیشن آفیسر بختیار کاکڑ، پرنسپل رحمت نگین، کنیزہ سعید، اساتذہ، طلبہ و طالبات، والدین اور دیگر افسران و معززین نے شرکت کی۔

تقریب کا آغاز تلاوتِ کلام پاک اور قومی ترانے سے ہوا۔ طلبہ و طالبات نے تقاریر، ملی نغمے، ٹیبلو اور ڈرامے پیش کیے جن میں قیامِ پاکستان کی قربانیوں، تحریکِ پاکستان کے رہنماؤں اور وطن سے محبت کے موضوعات اجاگر کیے گئے۔ اسکول کو قومی پرچموں، جھنڈیوں اور سبز و سفید سجاوٹ سے آراستہ کیا گیا تھا۔

کمشنر ولی محمد بڑیچ نے کہا کہ آزادی اللہ تعالیٰ کی عظیم نعمت ہے اور جن قوموں نے آزادی کی قدر نہیں کی وہ صفحۂ ہستی سے مٹ گئیں۔ یومِ آزادی محض جشن کا دن نہیں بلکہ اسلاف کی قربانیوں کو یاد کرنے، ملک کی تعمیر و ترقی کے لیے تجدیدِ عہد اور قومی ذمہ داریوں کے احساس کا موقع ہے۔ طلبہ تعلیم کے ساتھ نظم و ضبط، اتحاد، برداشت اور حب الوطنی کو زندگی کا حصہ بنائیں، اور قائداعظم محمد علی جناحؒ کے اصولوں اتحاد، ایمان اور تنظیم پر عمل کر کے پاکستان کو مضبوط، پرامن، خوشحال اور ترقی یافتہ ملک بنایا جا سکتا ہے۔

مقررین نے کہا کہ بلوچستان سمیت ملک کے تمام علاقوں میں تعلیم، صحت، امن اور ترقی کے فروغ کے لیے اجتماعی کوششیں وقت کی ضرورت ہیں۔ تقریب کے اختتام پر خصوصی دعا کی گئی اور مہمانِ خصوصی اور افسران نے بہترین پیشکش کرنے والے طلبہ میں انعامات تقسیم کیے۔

تصویر: بشکریہ ڈی جی پی آر بلوچستان