چمن روغانی روڈ کی تعمیر و بحالی: ڈپٹی کمشنر حبیب احمد بنگلزئی کی معیار اور مقررہ مدت میں تکمیل کی ہدایت

چمن: ڈپٹی کمشنر چمن حبیب احمد بنگلزئی کی زیر صدارت چمن شہر میں روغانی روڈ کی تعمیر و بحالی کے جاری منصوبے کی پیش رفت، معیار اور رفتار کا جائزہ لینے کے لیے اہم اجلاس ہوا۔

اجلاس میں محکمہ مواصلات و تعمیرات (C&W) کے ایگزیکٹو انجینئر، سب ڈویژنل آفیسر، اسسٹنٹ انجینئر، انجینئرنگ اسٹاف، منصوبے کے ٹھیکیداروں اور دیگر حکام نے شرکت کی، اور ڈپٹی کمشنر کو جاری کام، موجودہ پیش رفت، تعمیراتی مراحل اور تکمیل کی مقررہ مدت پر تفصیلی بریفنگ دی گئی۔

ڈپٹی کمشنر نے تعمیراتی کام کے معیار، رفتار اور شفافیت پر خصوصی زور دیتے ہوئے ہدایت کی کہ میٹریل کے معیار پر کسی قسم کا سمجھوتہ نہ کیا جائے اور منصوبہ مقررہ ٹائم لائن کے مطابق مکمل کیا جائے۔ انہوں نے منصوبے کے تمام مراحل کی باقاعدہ فنی و انتظامی نگرانی، مقررہ تکنیکی معیار کے مطابق کام اور غیر ضروری تاخیر سے گریز کی بھی ہدایت کی۔

انہوں نے کہا کہ روغانی روڈ ایک اہم عوامی شاہراہ ہے، جس کی تعمیر و بحالی سے شہریوں کو آمدورفت کی بہتر سہولت ملے گی، ٹریفک کا نظام بہتر ہوگا اور شہر کی خوبصورتی و انفراسٹرکچر کو مزید تقویت ملے گی۔

ڈپٹی کمشنر نے واضح کیا کہ ضلع چمن میں جاری تمام ترقیاتی منصوبوں کے معیار، رفتار اور شفافیت کی مسلسل نگرانی کی جا رہی ہے، اور عوامی اہمیت کے منصوبوں کی بروقت اور معیاری تکمیل ضلعی انتظامیہ کی اولین ترجیحات میں شامل ہے تاکہ ان کے ثمرات براہ راست عوام تک پہنچ سکیں۔

تصویر: بشکریہ ڈی جی پی آر بلوچستان