پنجگور میں یومِ استحصالِ کشمیر پر احتجاجی ریلی، ایڈیشنل ڈپٹی کمشنر عطاء اسد بلوچ کی صدارت

پنجگور: یومِ استحصالِ کشمیر کے موقع پر ضلعی انتظامیہ پنجگور کے زیرِ اہتمام ایک پروقار احتجاجی ریلی نکالی گئی، جس کی صدارت ایڈیشنل ڈپٹی کمشنر (جنرل) عطاء اسد بلوچ نے کی۔

ریلی میں ضلع بھر کے سرکاری محکموں کے سربراہان و افسران، سول سوسائٹی، اساتذہ، تاجروں اور مختلف شعبہ ہائے زندگی سے تعلق رکھنے والے افراد کی بڑی تعداد نے شرکت کی۔ شرکاء نے بینرز اور پلے کارڈز اٹھا رکھے تھے جن پر بھارتی جارحیت اور غاصبانہ تسلط کے خلاف اور کشمیری عوام کے حقِ خودارادیت کی حمایت میں پیغامات درج تھے۔

مقررین نے کہا کہ 5 اگست بھارت کی جانب سے مقبوضہ جموں و کشمیر کی خصوصی حیثیت غیر قانونی طور پر ختم کیے جانے کے خلاف یومِ سیاہ کے طور پر منایا جاتا ہے۔ انہوں نے کہا کہ پاکستان کا ہر شہری کشمیری بھائیوں اور بہنوں کے شانہ بشانہ کھڑا ہے اور ان کی منصفانہ جدوجہدِ آزادی کی ہر ممکن اخلاقی، سیاسی اور سفارتی حمایت جاری رکھے گا۔

تصویر: بشکریہ ڈی جی پی آر بلوچستان