نصیرآباد: ڈپٹی کمشنر وریندر لعل کی زیر صدارت پولیو کمیٹی کا اجلاس، گزشتہ مہم کی خامیاں دور کرنے کی ہدایت

نصیرآباد: ڈپٹی کمشنر نصیرآباد وریندر لعل کی زیرِ صدارت ڈسٹرکٹ پولیو ایریڈیکیشن کمیٹی (DPEC) کا اجلاس ہوا، جس میں محکمہ صحت، ضلعی انتظامیہ، پولیس، پی پی ایچ آئی، عالمی ادارہ صحت اور دیگر محکموں کے افسران نے شرکت کی۔

اجلاس میں گزشتہ مہم کے دوران پیش آنے والے مسائل اور ٹیموں کو درپیش چیلنجز کا جائزہ لیا گیا اور ٹیموں کی کارکردگی، بچوں کی کوریج، رہ جانے والے بچوں، انکاری والدین، مائیکرو پلاننگ، ٹیموں کی نقل و حرکت اور سیکیورٹی انتظامات پر بریفنگ دی گئی۔

ڈپٹی کمشنر نے ہدایت کی کہ مہم سے قبل تمام انتظامات حتمی شکل دی جائیں، مائیکرو پلانز زمینی حقائق کے مطابق بنائے جائیں اور ہر یونین کونسل اور دور دراز علاقے میں پانچ سال سے کم عمر تمام بچوں تک رسائی یقینی بنائی جائے۔ انہوں نے والدین سے پولیو ٹیموں سے تعاون کی اپیل کی۔

وریندر لعل نے گزشتہ مہم کی خامیاں دور کرنے، ٹیموں کی مؤثر نگرانی اور فیلڈ میں غفلت پر فوری کارروائی کی ہدایت کی اور کہا کہ تمام ادارے مربوط حکمتِ عملی کے تحت نصیرآباد کو پولیو سے پاک بنانے کے لیے اپنی صلاحیتیں بروئے کار لائیں گے۔

تصویر: بشکریہ ڈی جی پی آر بلوچستان