نصیرآباد: حفاظتی ٹیکہ جات کا ماہانہ جائزہ، ڈپٹی کمشنر وریندر لعل کی محروم بچوں کی نشاندہی کی ہدایت

نصیرآباد: ڈپٹی کمشنر نصیرآباد وریندر لعل کی زیرِ صدارت بچوں کے حفاظتی ٹیکہ جات کے حوالے سے ماہانہ جائزہ اجلاس منعقد ہوا، جس میں محکمہ صحت کے افسران اور متعلقہ حکام نے شرکت کی۔

اجلاس میں ضلع میں بچوں کو مختلف بیماریوں سے محفوظ رکھنے کے لیے جاری حفاظتی ٹیکہ جات کے پروگرام، ویکسینیشن کوریج، فیلڈ سرگرمیوں اور درپیش مسائل کا تفصیلی جائزہ لیا گیا اور متعلقہ افسران نے ڈپٹی کمشنر کو بریفنگ دی۔

وریندر لعل نے کہا کہ بچوں کو بروقت حفاظتی ٹیکے لگوانا ان کی صحت اور محفوظ مستقبل کے لیے انتہائی ضروری ہے، اس لیے محکمہ صحت کے افسران اور ویکسینیشن ٹیمیں اپنی ذمہ داریاں پوری محنت سے انجام دیں۔ انہوں نے ہدایت کی کہ دور دراز علاقوں سمیت تمام یونین کونسلز میں ٹیکہ جات کی سہولت یقینی بنائی جائے اور کسی بھی وجہ سے ویکسینیشن سے محروم رہ جانے والے بچوں کی نشاندہی کی جائے۔

ڈپٹی کمشنر نے کہا کہ والدین میں حفاظتی ٹیکہ جات کے بارے میں شعور اجاگر کرنے کے لیے آگاہی سرگرمیاں مزید مؤثر بنائی جائیں تاکہ کوئی بچہ ضروری ویکسین سے محروم نہ رہے۔ اجلاس میں پروگرام کو مزید مؤثر بنانے اور مقررہ اہداف کے حصول کے لیے مختلف اقدامات پر بھی غور کیا گیا۔

تصویر: بشکریہ ڈی جی پی آر بلوچستان