مکران ڈویژن میں ستمبر پولیو مہم: کمشنر ڈاکٹر طفیل احمد بلوچ کی زیر صدارت ڈویژنل ٹاسک فورس کا اجلاس

تربت: کمشنر مکران ڈویژن ڈاکٹر طفیل احمد بلوچ کی زیر صدارت ڈویژنل ٹاسک فورس ایس این آئی ڈی ستمبر 2026 کا اجلاس منعقد ہوا، جس میں ضلع کیچ اور گوادر میں شروع ہونے والی ستمبر پولیو مہم کی تیاریوں اور مؤثر عملدرآمد کی حکمت عملی کا تفصیلی جائزہ لیا گیا۔

اجلاس میں ڈپٹی کمشنر کیچ یاسر اقبال دشتی، ڈویژنل پولیو آفیسر احسان اللہ، ڈسٹرکٹ پولیو آفیسر ڈاکٹر ارسلان درازئی، ڈائریکٹر ہیلتھ محب اللہ، ایم ایس سول ہسپتال گوادر ڈاکٹر حفیظ بلوچ، ڈی ایس ایم پی پی ایچ آئی ڈاکٹر مرتضیٰ، آر ایم او سول ہسپتال تربت ڈاکٹر مہرین باقر اور دیگر افسران شریک ہوئے۔

اجلاس میں پولیو ٹیموں کی تشکیل و تعیناتی، سکیورٹی انتظامات، ٹیموں کی نگرانی اور پانچ سال سے کم عمر تمام بچوں تک سو فیصد رسائی یقینی بنانے کے اقدامات کا جائزہ لیا گیا، جبکہ رہ جانے والے بچوں کی نشاندہی کے لیے مؤثر مائیکرو پلاننگ اور مربوط حکمت عملی اپنانے پر زور دیا گیا۔

کمشنر مکران نے ہدایت کی کہ مہم کی کامیابی کے لیے تمام دستیاب وسائل بروئے کار لائے جائیں اور ٹیموں کو بھرپور سکیورٹی، ضروری سہولیات اور مؤثر نگرانی فراہم کی جائے۔ انہوں نے کہا کہ کسی بچے کے پولیو کے قطروں سے محروم رہنے کی گنجائش نہیں، اس لیے تمام ادارے باہمی رابطے سے مہم کے اہداف یقینی بنائیں۔

اجلاس میں پولیو کے خاتمے کی کوششوں کو مزید مؤثر بنانے، فیلڈ ٹیموں کی کارکردگی کی مسلسل نگرانی اور درپیش مسائل کے فوری حل کے عزم کا اظہار بھی کیا گیا۔

تصویر: بشکریہ ڈی جی پی آر بلوچستان