مولانا ہدایت الرحمن بلوچ کا اورماڑہ کا دورہ، اسسٹنٹ کمشنر ڈاکٹر ماہ نور برکت سے عوامی مسائل پر ملاقات

اورماڑہ: رکن صوبائی اسمبلی بلوچستان مولانا ہدایت الرحمن بلوچ نے اورماڑہ کا دورہ کیا، جہاں انہوں نے پارٹی کارکنان کے ہمراہ اسسٹنٹ کمشنر اورماڑہ ڈاکٹر ماہ نور برکت سے ان کے دفتر میں ملاقات کی۔ اس موقع پر تحصیلدار اورماڑہ نورجان بھی موجود تھے۔

ملاقات میں اورماڑہ کے عوامی مسائل، انتظامی امور، بنیادی سہولیات کی فراہمی اور جاری ترقیاتی اقدامات پر تفصیلی تبادلۂ خیال کیا گیا۔

رکن صوبائی اسمبلی نے کہا کہ بلوچستان کی ترقی اور عوام کی خوشحالی ہماری اولین ترجیح ہے اور ہماری سیاست کا محور عوامی خدمت ہے۔ انہوں نے کہا کہ اورماڑہ ضلع گوادر کا اہم حصہ ہے، یہاں کے عوام کو صحت، تعلیم، پینے کے صاف پانی، بجلی اور روزگار جیسی بنیادی سہولیات کی فراہمی کے لیے ہر ممکن اقدامات کیے جائیں گے۔

مولانا ہدایت الرحمن بلوچ نے عوامی مسائل کے حل کے لیے اسسٹنٹ کمشنر اورماڑہ کی کاوشوں کو سراہا اور امید ظاہر کی کہ انتظامیہ اور عوامی نمائندگان مل کر علاقے کی ترقی کے لیے اپنا کردار ادا کرتے رہیں گے۔

اسسٹنٹ کمشنر ڈاکٹر ماہ نور برکت نے رکن صوبائی اسمبلی کا شکریہ ادا کرتے ہوئے یقین دہانی کرائی کہ عوامی شکایات کے فوری ازالے، میرٹ پر مبنی انتظامی فیصلوں اور ترقیاتی منصوبوں کی شفاف تکمیل کے لیے انتظامیہ پوری طرح متحرک ہے۔ ان کا کہنا تھا کہ عوام اور انتظامیہ کے درمیان رابطے کو مزید مضبوط بنا کر اورماڑہ کو ترقی کی راہ پر گامزن کیا جائے گا۔

تصویر: بشکریہ ڈی جی پی آر بلوچستان