مغربی کنارے میں آبادکاروں کا حملہ، فرانسیسی میئر برنار بوڈو کا حکومتی رویے پر سوال

غزہ: مقبوضہ مغربی کنارے کے فلسطینی قصبے طیبہ میں اسرائیلی آبادکاروں کے حملے کا نشانہ بننے والے فرانس کے میئر نے کہا ہے کہ یہ واقعہ اسرائیل کی دائیں بازو کی حکومت کی جانب سے آبادکاروں کے تشدد کو برداشت کیے جانے کی عکاسی کرتا ہے۔

رپورٹ کے مطابق یہودی آبادکاروں نے یورپی یونین کے سفارتکاروں اور ایک خاتون صحافی کو بھی تشدد کا نشانہ بنایا۔

فرانسیسی خبر رساں ادارے سے گفتگو کرتے ہوئے شمالی فرانس کے قصبے اولوئے-ایمیری کے میئر برنار بوڈو نے کہا کہ اگر اسرائیلی آبادکار اس طرح کا رویہ اختیار کر رہے ہیں تو اس سے ظاہر ہوتا ہے کہ اسرائیلی حکومت ایسے اقدامات کو برداشت کر رہی ہے۔

برنار بوڈو کے مطابق وہ خیرسگالی کے دورے پر طیبہ میں موجود تھے، جہاں ان پر اسرائیلی آبادکاروں نے حملہ کیا۔

انہوں نے واقعے پر تشویش کا اظہار کرتے ہوئے کہا کہ آبادکاروں کے اس طرزِ عمل سے فلسطینی علاقوں میں تشدد کے خلاف حکومتی رویے پر سوالات اٹھتے ہیں۔