لورالائی: ڈسٹرکٹ ہیلتھ کمیٹی اجلاس، غیر فعال بی ایچ یوز، آر ایچ سیز اور بے نظیر ہسپتال کو فعال کرنے کی ہدایت

لورالائی: ڈپٹی کمشنر لورالائی کیپٹن (ر) محمد حسیب شجاع کی زیرِ صدارت ڈسٹرکٹ ہیلتھ کمیٹی (DHC) کا اجلاس منعقد ہوا، جس میں ضلع بھر کے سرکاری مراکزِ صحت کی کارکردگی، طبی سہولیات کی فراہمی اور محکمہ صحت سے متعلق امور کا تفصیلی جائزہ لیا گیا۔

اجلاس میں ڈسٹرکٹ ہیلتھ آفیسر ڈاکٹر مقبول احمد، ایم ایس ڈاکٹر نقیب اللہ نیازی، ڈی ایس ایم پی پی ایچ آئی ڈاکٹر فرحان کاکڑ، پاپولیشن آفیسر ڈاکٹر نسرین گل اور ڈاکٹر محمد فہیم اوتمانخیل سمیت محکمہ صحت کے دیگر افسران نے شرکت کی۔

اجلاس میں ڈاکٹرز اور پیرامیڈیکل اسٹاف کی حاضری، پابندی وقت، ضروری ادویات کی دستیابی اور طبی مراکز کی کارکردگی کا جائزہ لیا گیا۔ مسلسل غیر حاضر ملازمین کے معاملات بھی زیرِ بحث آئے اور ان کے خلاف مؤثر اقدامات پر زور دیا گیا، جبکہ ضلع میں بند یا غیر فعال بنیادی مراکزِ صحت (BHUs)، دیہی مراکزِ صحت (RHCs) اور بے نظیر ہسپتال کو دوبارہ فعال بنانے کے اقدامات اور مسائل کا بھی جائزہ لیا گیا۔

ڈپٹی کمشنر نے ہدایت کی کہ غیر حاضری کے معاملات میں قواعد کے مطابق مؤثر کارروائی کی جائے، سرکاری مراکزِ صحت میں ضروری ادویات کی دستیابی یقینی بنائی جائے اور حاضری کا نظام مزید مؤثر بنایا جائے۔ انہوں نے غیر فعال طبی مراکز کو فعال کرنے کے لیے فوری عملی اقدامات کی ہدایت کی اور کہا کہ دور دراز علاقوں کے عوام کو صحت کی بنیادی سہولیات ان کی دہلیز پر فراہم کرنے کے لیے تمام وسائل بروئے کار لائے جائیں۔

تصویر: بشکریہ ڈی جی پی آر بلوچستان