لورالائی میں سرکاری اراضی پر قبضوں کے خلاف مرحلہ وار کارروائی ہوگی: ڈپٹی کمشنر محمد حسیب شجاع

لورالائی: ڈپٹی کمشنر لورالائی کیپٹن (ر) محمد حسیب شجاع کی زیرِ صدارت سرکاری اراضی پر تجاوزات اور غیر قانونی قبضوں کے حوالے سے اہم اجلاس منعقد ہوا جس میں سرکاری اراضی کے تحفظ، تجاوزات کی نشاندہی اور قبضوں کے خاتمے کے لیے جامع حکمتِ عملی پر غور کیا گیا۔

اجلاس میں اسسٹنٹ کمشنر لورالائی ندیم اکرم، ایڈیشنل ڈپٹی کمشنر (جنرل) علی نواز جمالی، تحصیلدار محمد عظیم اور پٹواریوں نے شرکت کی، اور ضلع بھر میں سرکاری اراضی کی صورتحال، ریونیو ریکارڈ، تجاوزات اور مبینہ غیر قانونی قبضوں کا جائزہ لیا گیا۔

ڈپٹی کمشنر نے ریونیو افسران کو ہدایت کی کہ سرکاری اراضی کا ریکارڈ مکمل طور پر مرتب اور اپ ڈیٹ کیا جائے، زمین کی نشاندہی، پیمائش اور حد بندی ریونیو ریکارڈ کے مطابق کی جائے اور تمام معاملات میں شفافیت اور قانونی تقاضوں کا خیال رکھا جائے۔

انہوں نے واضح کیا کہ سرکاری اراضی پر کوئی غیر قانونی قبضہ یا تجاوز برداشت نہیں ہوگی، قانون کے مطابق جلد مرحلہ وار کارروائی شروع کی جائے گی اور زیرِ قبضہ اراضی واگزار کرا کے سرکاری تحویل میں لی جائے گی، جبکہ کسی سے امتیازی سلوک نہیں ہوگا۔ کارروائی سے پہلے انتقالات، کھاتہ جات، رجسٹر اور دیگر ریونیو دستاویزات کی مکمل جانچ کی ہدایت بھی کی گئی۔

اجلاس میں اتفاق ہوا کہ مستقبل میں تجاوزات روکنے کے لیے مؤثر نگرانی کا نظام قائم ہوگا اور نئی تجاوز یا غیر قانونی تعمیر کی بروقت نشاندہی کر کے کارروائی کی جائے گی۔ ڈپٹی کمشنر نے کہا کہ سرکاری املاک قومی اثاثہ ہیں، اور انتظامیہ کا مقصد صرف تجاوزات کا خاتمہ نہیں بلکہ ریونیو ریکارڈ کی درستگی، سرکاری املاک کا تحفظ اور قانون کی بالادستی یقینی بنانا بھی ہے۔

تصویر: بشکریہ ڈی جی پی آر بلوچستان