لورالائی میں سرکاری اراضی، ایریگیشن نالوں اور بازار سے تجاوزات کے خلاف کارروائی کا آغاز

لورالائی: ڈپٹی کمشنر لورالائی کیپٹن (ر) محمد حسیب شجاع کے احکامات پر ضلعی انتظامیہ نے شہر اور گردونواح میں سرکاری اراضی، ایریگیشن نالوں اور بازار میں قائم غیر قانونی تجاوزات کے خلاف باقاعدہ کارروائی شروع کر دی ہے۔

نائب تحصیلدار محمد عظیم کی سربراہی میں عملے نے مختلف علاقوں کا معائنہ کر کے تجاوزات کی نشاندہی شروع کی، جبکہ حکام کو تجاوزات فوری ہٹانے اور سرکاری اراضی واگزار کرانے کی ہدایات جاری کی گئی ہیں۔ انتظامیہ کے مطابق تجاوزات سے آمدورفت اور ٹریفک متاثر ہوتی ہے اور ایریگیشن نالوں پر قبضہ نکاسی آب اور آبپاشی کے نظام کو بھی متاثر کر سکتا ہے۔

ڈپٹی کمشنر نے ہدایت کی کہ کارروائی قانون کے مطابق اور بلاامتیاز کی جائے اور دوبارہ تجاوزات کی روک تھام کے لیے مؤثر نگرانی کا نظام بنایا جائے۔ انتظامیہ نے دکانداروں اور شہریوں سے اپیل کی کہ سرکاری حدود میں تعمیرات سے گریز کریں، عوامی گزرگاہیں کھلی رکھیں اور کسی بھی تجاوز کی اطلاع ضلعی انتظامیہ کو دیں۔

تصویر: بشکریہ ڈی جی پی آر بلوچستان