فلائی دبئی پرواز: معاون پائلٹ کے کلہاڑی حملے کے بعد زخمی کپتان نے بپتا سنا دی

ابوظہبی: دبئی سے تل ابیب جانے والی فلائی دبئی کی پرواز کے کپتان نے انکشاف کیا ہے کہ دورانِ پرواز معاون پائلٹ نے کلہاڑی سے حملہ کیا تو انہیں اپنی جان بچنے کا یقین نہیں تھا۔

بھارتی شہری کپتان سمت مچھر نے حملے کے دوران سر پر ہونے والے وار اپنے بازو سے روکنے کی کوشش کی اور مدد کے لیے چیختے رہے۔

رائٹرز کے مطابق کپتان نے ابوظہبی کے ایک اسپتال میں اخبار دی نیشنل کو انٹرویو دیتے ہوئے بتایا کہ ابتدائی وار کے بعد انہیں پہلے لگا کہ طیارے کے ڈھانچے میں کوئی سنگین خرابی پیدا ہو گئی ہے، لیکن جلد ہی انہیں احساس ہو گیا کہ ان پر حملہ کیا جا رہا ہے۔

کپتان کے مطابق انہوں نے فوراً سیٹ بیلٹ کھولنے کی کوشش کی اور خود کو بچانے کے لیے وار روکتے رہے۔ حملہ آور کے وار ان کے سر کی جانب آ رہے تھے، جبکہ دفاع کے دوران ان کا بازو بھی زخمی ہو گیا۔

انہوں نے کاک پٹ کا دروازہ کھولنے کے لیے نوب تک ہاتھ بڑھایا اور اپنے ساتھیوں کو مدد کے لیے پکارتے رہے۔ اسی دوران وہ بے ہوش ہو گئے۔

واقعہ فلائی دبئی کی پرواز میں پیش آیا، جو اس وقت سعودی عرب کی فضائی حدود میں تھی۔ رپورٹ کے مطابق حملے کے نتیجے میں طیارہ صرف 30 سیکنڈ میں تقریباً 16 ہزار فٹ نیچے آ گیا۔

بعد ازاں طیارے میں موجود دیگر دو پائلٹس اور عملے نے حملہ آور پر قابو پایا اور جہاز کو سعودی عرب میں بحفاظت اتار لیا۔