عطاء شاد ڈگری کالج تربت کے طلباء کا ریڈیو پاکستان تربت کا مطالعاتی دورہ، براہِ راست پروگرام میں شرکت

تربت: گورنمنٹ بوائز عطاء شاد ڈگری کالج تربت کے آرٹس کے طالب علموں کے ایک وفد نے پروفیسر بلوچ خان اور پروفیسر نور محمد کی سربراہی میں ریڈیو پاکستان تربت کا تفصیلی مطالعاتی دورہ کیا۔ دورے کا مقصد طلباء کو نشریاتی ادارے کے طریقۂ کار اور جدید دور میں ریڈیو کی اہمیت سے روشناس کرانا تھا۔

اس موقع پر اسٹیشن ڈائریکٹر ریڈیو پاکستان تربت عبدالحمید شاکر، سینئر پروڈیوسر جلیل احمد، انجینئر اکرم بلوچ، نیوز ایڈیٹر عبدالصمد خالق اور دیگر افسران موجود تھے۔ وفد کو ریڈیو کے تمام شعبوں کا دورہ کرایا گیا۔

انجینئر اکرم بلوچ نے طلباء کو اسٹوڈیو بلاک، کنٹرول روم، ٹرانسمیٹر اور دیگر تکنیکی شعبے دکھائے اور بتایا کہ ایک پروگرام ریکارڈنگ سے سامعین تک کیسے پہنچتا ہے اور اس میں جدید ٹیکنالوجی کا کیا کردار ہے۔ طلباء نے ریڈیو ٹیکنالوجی، نشریات اور ساؤنڈ سسٹم سے متعلق سوالات کیے جن کے تسلی بخش جوابات دیے گئے۔

سینئر پروڈیوسر جلیل احمد نے طلباء کو ریڈیو پاکستان تربت کے معلوماتی، تعلیمی، ادبی اور تفریحی پروگراموں سے آگاہ کیا اور بتایا کہ ریڈیو پاکستان تربت بلوچی اور اردو زبانوں میں کیچ اور مکران کے عوام کی ثقافت، تعلیم اور مسائل اجاگر کرنے میں کلیدی کردار ادا کر رہا ہے۔ طلباء نے براہِ راست پروگرام میں بھی حصہ لیا اور سامعین کے ساتھ اپنے خیالات کا اظہار کیا، جسے ان کے لیے یادگار تجربہ قرار دیا گیا۔

ریڈیو آج بھی سستا اور بااعتماد ذریعہ ابلاغ

اسٹیشن ڈائریکٹر عبدالحمید شاکر نے طلباء سے خطاب میں کہا کہ سوشل میڈیا اور ڈیجیٹل میڈیا کے دور میں بھی ریڈیو کی اہمیت کم نہیں ہوئی بلکہ بڑھ گئی ہے۔ ریڈیو آج بھی دنیا کا سب سے سستا، قابلِ رسائی اور بااعتماد ذریعہ ابلاغ ہے، خاص طور پر دور دراز علاقوں، دیہاتوں اور سرحدی پٹی میں جہاں انٹرنیٹ کی سہولت محدود ہے، وہاں ریڈیو ہی عوام کو بروقت خبریں، موسم کی صورتحال، تعلیمی معلومات اور تفریح فراہم کرتا ہے۔ انہوں نے کہا کہ ریڈیو پاکستان قومی یکجہتی، تعلیم اور عوامی شعور اجاگر کرنے کا سب سے مؤثر ہتھیار ہے۔

انہوں نے طلباء پر زور دیا کہ وہ ریڈیو سے جڑے رہیں اور ریڈیو پاکستان کے پلیٹ فارم سے اپنی آواز عوام تک پہنچائیں۔ دورے کے اختتام پر کالج کے لیکچرار اور طلباء نے ریڈیو پاکستان تربت کی انتظامیہ کا شکریہ ادا کیا اور دورے کو انتہائی معلوماتی اور مفید قرار دیا۔

تصویر: بشکریہ ڈی جی پی آر بلوچستان