صحبت پور: ڈپٹی کمشنر فریدہ ترین کا گورنمنٹ گرلز ہائی سکول عبدالفتح کھوسہ کا دورہ، اساتذہ کی حاضری کا جائزہ

صحبت پور: ڈپٹی کمشنر صحبت پور فریدہ ترین نے ڈسٹرکٹ ایجوکیشن آفیسر صحبت پور کے ہمراہ گورنمنٹ گرلز ہائی سکول عبدالفتح کھوسہ کا تفصیلی دورہ کیا اور سکول کے مختلف شعبہ جات کا معائنہ کرتے ہوئے تعلیمی ماحول، تدریسی عمل، اساتذہ کی حاضری، طالبات کی تعلیمی سرگرمیوں اور سکول میں فراہم کی جانے والی بنیادی سہولیات کا جائزہ لیا۔

ڈپٹی کمشنر نے کلاس رومز کا دورہ کرتے ہوئے طالبات سے مختلف سوالات کیے اور ان کی تعلیمی استعداد، نصاب اور تدریسی عمل کے بارے میں آگاہی حاصل کی۔ انہوں نے اساتذہ کی حاضری اور تدریسی ذمہ داریوں کا بھی جائزہ لیا اور زور دیا کہ تعلیمی اداروں میں اساتذہ کی بروقت حاضری اور مؤثر تدریسی عمل ہر صورت یقینی بنایا جائے۔

بچیوں کی تعلیم وقت کی اہم ضرورت

فریدہ ترین نے کہا کہ حکومت بلوچستان صوبے میں شعبہ تعلیم کی بہتری، تعلیمی اداروں میں سہولیات کی فراہمی اور طلبہ و طالبات کو معیاری تعلیم کے مواقع فراہم کرنے کے لیے بھرپور اقدامات کر رہی ہے۔ تعلیم ہی وہ بنیادی ذریعہ ہے جس کے ذریعے معاشرے میں مثبت تبدیلی اور ترقی کی بنیاد رکھی جا سکتی ہے۔

انہوں نے اساتذہ پر زور دیا کہ وہ اپنی پیشہ ورانہ ذمہ داریاں احسن انداز میں ادا کرتے ہوئے طالبات کی تعلیم و تربیت پر خصوصی توجہ دیں تاکہ انہیں جدید تقاضوں سے ہم آہنگ معیاری تعلیم فراہم کی جا سکے، اور نصابی تعلیم کے ساتھ ان کی کردار سازی، اخلاقی تربیت اور صلاحیتوں کو اجاگر کرنے میں بھی اپنا کردار ادا کریں۔

ڈپٹی کمشنر نے کہا کہ ضلع صحبت پور میں تعلیمی اداروں کی کارکردگی بہتر بنانے اور طالبات کو سازگار تعلیمی ماحول فراہم کرنے کے لیے تمام دستیاب وسائل بروئے کار لائے جائیں گے۔ انہوں نے محکمہ تعلیم کے افسران کو ہدایت کی کہ سکولوں میں اساتذہ کی حاضری، تدریسی معیار اور بنیادی سہولیات کی فراہمی یقینی بنانے کے لیے باقاعدگی سے نگرانی کی جائے۔ انہوں نے کہا کہ بچیوں کی تعلیم پر خصوصی توجہ وقت کی اہم ضرورت ہے کیونکہ تعلیم یافتہ اور باصلاحیت بچیاں مستقبل میں ایک بہتر، باشعور اور ترقی یافتہ معاشرے کی تشکیل میں اہم کردار ادا کر سکتی ہیں۔

تصویر: بشکریہ ڈی جی پی آر بلوچستان