شیرانی: ڈپٹی کمشنر کلیم اللہ کاکڑ کا لائن ڈیپارٹمنٹس کا جائزہ، منصوبوں میں تاخیر برداشت نہ کرنے کا اعلان

شیرانی: ڈپٹی کمشنر شیرانی کلیم اللہ کاکڑ کی زیرِ صدارت ضلع کے تمام لائن ڈیپارٹمنٹس کی کارکردگی اور جاری ترقیاتی و انتظامی امور کا جائزہ لینے کے لیے اہم اجلاس منعقد ہوا، جس میں محکموں کے سربراہان، ضلعی افسران اور متعلقہ حکام نے شرکت کی۔ افسران نے اپنے محکموں کی کارکردگی، جاری منصوبوں، ترقیاتی سرگرمیوں، عوامی خدمات اور درپیش مسائل سے متعلق پروگریس رپورٹس پیش کیں۔

ڈپٹی کمشنر نے رپورٹس کا جائزہ لیتے ہوئے ہدایت کی کہ سرکاری امور میں شفافیت، میرٹ اور عوامی مفاد کو اولین ترجیح دی جائے۔ انہوں نے کہا کہ ضلعی انتظامیہ کا بنیادی مقصد عوام کو بہتر سرکاری سہولیات کی فراہمی اور ترقیاتی عمل کو تیز کرنا ہے، اس لیے تمام محکمے باہمی رابطے اور مؤثر حکمتِ عملی کے تحت کام کریں۔

انہوں نے ہدایت کی کہ تمام ترقیاتی منصوبے مقررہ مدت میں مکمل کیے جائیں، تعمیراتی معیار پر کوئی سمجھوتہ نہ ہو اور منصوبوں کی باقاعدہ نگرانی کی جائے تاکہ سرکاری وسائل کا مؤثر استعمال یقینی ہو۔ اجلاس میں عوامی مسائل کے فوری ازالے، دفاتر میں نظم و ضبط، حاضری، شکایات کے بروقت حل اور محکمانہ رابطہ کاری پر بھی زور دیا گیا۔

کلیم اللہ کاکڑ نے کہا کہ افسران عوام کے خادم کی حیثیت سے فرائض انجام دیں اور لوگوں کو سرکاری دفاتر میں غیر ضروری مشکلات کا سامنا نہ کرنا پڑے۔ انہوں نے واضح کیا کہ ترقیاتی منصوبوں میں تاخیر، سرکاری امور میں غفلت اور عوامی مسائل کے حل میں سستی کسی صورت برداشت نہیں کی جائے گی، اور ضلعی انتظامیہ شیرانی عوامی فلاح اور ضلع کی مجموعی ترقی کے لیے تمام وسائل بروئے کار لانے کے لیے پرعزم ہے۔

تصویر: بشکریہ ڈی جی پی آر بلوچستان