سیوی: ڈسٹرکٹ انٹیلیجنس کوآرڈینیشن کمیٹی کا اجلاس، حساس مقامات پر نگرانی سخت کرنے کی ہدایت

سیوی: ڈپٹی کمشنر سیوی میجر (ر) الیاس کبزئی کی زیرِ صدارت ڈسٹرکٹ انٹیلیجنس کوآرڈینیشن کمیٹی کا اہم اجلاس منعقد ہوا، جس میں ونگ کمانڈر کرنل شہریار، ایس ایس پی سیوی عبدالحمید، اسسٹنٹ کمشنر سیوی منصور علی شاہ، قانون نافذ کرنے والے اداروں کے افسران اور متعلقہ اداروں کے نمائندوں نے شرکت کی۔

اجلاس میں ضلع میں امن و امان کی مجموعی صورتحال، حالیہ سیکیورٹی حالات، حساس مقامات کی حفاظت اور عوام کے جان و مال کے تحفظ سے متعلق امور کا تفصیلی جائزہ لیا گیا۔

ڈپٹی کمشنر نے کہا کہ موجودہ حالات کے پیش نظر تمام ادارے مکمل ہم آہنگی، بروقت رابطے اور موثر انٹیلیجنس شیئرنگ یقینی بنائیں تاکہ کسی بھی ناخوشگوار واقعے کی بروقت روک تھام ہو سکے۔ انہوں نے ہدایت کی کہ ضلع بھر میں سیکیورٹی انتظامات مزید موثر بنائے جائیں، حساس تنصیبات، سرکاری املاک اور عوامی مقامات پر نگرانی سخت کی جائے اور گشت، چیکنگ اور دیگر حفاظتی اقدامات میں مزید بہتری لائی جائے۔

ڈپٹی کمشنر نے کہا کہ ضلعی انتظامیہ اور قانون نافذ کرنے والے ادارے عوام کے جان و مال کے تحفظ اور پائیدار امن کے لیے ہر ممکن اقدامات جاری رکھیں گے۔ اجلاس میں عزم ظاہر کیا گیا کہ تمام ادارے باہمی تعاون اور مربوط حکمت عملی کے تحت اپنی ذمہ داریاں موثر انداز میں انجام دیتے رہیں گے۔

تصویر: بشکریہ ڈی جی پی آر بلوچستان