سنجاوی میں ملیریا سے بچاؤ کی اسپرے مہم کا افتتاح

سنجاوی: ڈپٹی کمشنر زیارت عبدالقدوس اچکزئی اور وزیر اعلیٰ بلوچستان میر سرفراز بگٹی کے احکامات پر تحصیل سنجاوی میں ملیریا سے بچاؤ کے لیے اسپرے مہم کا باقاعدہ افتتاح کر دیا گیا۔ افتتاحی تقریب کی نگرانی ڈسٹرکٹ ہیلتھ آفیسر زیارت ڈاکٹر رفیق مستوئی نے کی۔

اس موقع پر ڈی ایم پی پی ایچ آئی زیارت ممتاز علی رند، ڈرگ انسپکٹر تحصیل زیارت محمد عدیل، ڈسٹرکٹ کوآرڈینیٹر ملیریا کنٹرول پروگرام آئی ایچ ایچ این جمعہ خان اور ملیریا سپروائزر غلام اللہ بھی موجود تھے۔ ٹیم نے ملیریا سے بچاؤ اور اس کے تدارک کی اہمیت پر تبادلۂ خیال کیا۔

شرکاء نے عزم ظاہر کیا کہ اسپرے مہم کو کامیاب بنانے، ملیریا کے پھیلاؤ کو روکنے اور مقامی آبادی کو اس بیماری سے محفوظ رکھنے کے لیے تمام دستیاب وسائل بروئے کار لائے جائیں گے۔ حکام نے کہا کہ عوامی آگاہی کے ساتھ حفاظتی اقدامات کو مزید مؤثر بنایا جائے گا تاکہ علاقے کے عوام کو صحت مند اور محفوظ ماحول میسر آ سکے۔

تصویر: بشکریہ ڈی جی پی آر بلوچستان