ساؤتھ ایئر لائن کی پہلی پرواز کراچی سے تربت پہنچ گئی، مکران میں فضائی سفر کے نئے دور کا آغاز

تربت: مکران ڈویژن میں فضائی سفر کے نئے دور کا آغاز ہو گیا، پاکستان کی نجی فضائی کمپنی ساؤتھ ایئر لائن کی پہلی پرواز کراچی سے مسافروں کو لے کر تربت پہنچ گئی۔

اس موقع پر ڈپٹی کمشنر کیچ یاسر اقبال دشتی، ایس ایس پی کیچ کیپٹن (ر) زوہیب محسن اور دیگر حکام نے ساؤتھ ایئر لائن کے ڈائریکٹر ایڈمنسٹریشن اینڈ سیکیورٹی بریگیڈیئر عامر، بورڈ آف گورنرز کے ممبر شاہد گچکی، دیگر معزز مہمانوں اور مسافروں کا پرتپاک استقبال کیا۔ استقبالی تقریب میں ڈی ایس پی (یو ٹی) دانش بلوچ، ساؤتھ ایئر لائن تربت کا عملہ، ضلعی انتظامیہ کے افسران اور دیگر متعلقہ حکام بھی موجود تھے۔

شرکاء نے ساؤتھ ایئر لائن کی سروس کو مکران کے عوام کے لیے مثبت اور تاریخی پیش رفت قرار دیتے ہوئے امید ظاہر کی کہ مستقبل میں مزید شہروں کے لیے پروازوں کا دائرہ کار بھی وسیع کیا جائے گا۔ بعد ازاں یہ پرواز تربت سے کوئٹہ کے لیے روانہ ہو گئی۔

مسافروں کی تعداد بڑھی تو نئی منزلیں

ساؤتھ ایئر لائن کے ڈائریکٹر ایڈمنسٹریشن اینڈ سیکیورٹی بریگیڈیئر عامر نے میڈیا سے گفتگو میں کہا کہ مکران اور بلوچستان کے عوام کو درپیش سفری مشکلات، طویل زمینی سفر اور فضائی سہولیات کی محدود دستیابی کو مدنظر رکھتے ہوئے ساؤتھ ایئر لائن نے اپنی سروس کا آغاز کیا ہے۔ کمپنی کا مقصد عوام کو محفوظ، معیاری اور کم خرچ سفری سہولیات فراہم کرنا ہے، اور اگر عوام کا ردعمل مثبت رہا اور مسافروں کی تعداد بڑھی تو مستقبل میں مزید پروازیں اور نئی منزلیں بھی شامل کی جائیں گی۔

ڈپٹی کمشنر کیچ یاسر اقبال دشتی نے کہا کہ تربت سمیت پورے مکران میں قومی ایئر لائن پی آئی اے کے ساتھ دیگر نجی ایئر لائن کی سروس کا آغاز خوش آئند پیش رفت ہے۔ اس سے نہ صرف عوام کو بہتر سفری سہولیات میسر آئیں گی بلکہ فضائی سفر میں مسابقت پیدا ہونے سے مسافروں کو مزید آسانیاں بھی حاصل ہوں گی۔ انہوں نے امید ظاہر کی کہ ساؤتھ ایئر لائن خطے کے عوام کی توقعات پر پورا اترے گی۔

ساؤتھ ایئر لائن کے بورڈ ممبر اور مکران کی معروف سماجی و کاروباری شخصیت شاہد گچکی نے کہا کہ اس سروس سے مکران ڈویژن کا کراچی، کوئٹہ اور ملک کے دیگر بڑے شہروں سے فضائی رابطہ مزید مضبوط ہوگا۔ ماضی میں طویل زمینی سفر کی وجہ سے کاروباری افراد، طلبہ، مریضوں اور دیگر مسافروں کو شدید مشکلات کا سامنا کرنا پڑتا تھا، تاہم نئی فضائی سروس سے نہ صرف سفر آسان ہوگا بلکہ تجارت، سرمایہ کاری، سیاحت اور معاشی سرگرمیوں کو بھی فروغ ملے گا۔

انہوں نے کہا کہ مکران جیسے وسیع خطے میں جدید اور معیاری فضائی سہولیات کی فراہمی وقت کی اہم ضرورت تھی، اور ساؤتھ ایئر لائن اس ضرورت کو پورا کرنے کے لیے عملی اقدامات کر رہی ہے۔

تصویر: بشکریہ ڈی جی پی آر بلوچستان