خضدار: ڈپٹی کمشنر عبدالرزاق ساسولی نے ہسپتالوں کی صفائی کے جائزے کے لیے کمیٹی بنا دی، انسینیٹر استعمال کی ہدایت

خضدار: ڈپٹی کمشنر خضدار عبدالرزاق ساسولی کی صدارت میں ضلع خضدار کے تمام سرکاری و پرائیویٹ ہسپتالوں، کلینکس اور میڈیکل سینٹرز کی صحت اور صفائی ستھرائی کے حوالے سے ایک اہم اجلاس ڈپٹی کمشنر آفس میں منعقد ہوا۔

اجلاس میں خضدار شہر کے تمام پرائیویٹ اسپتالوں، کلینکس اور میڈیکل سینٹرز کی صفائی ستھرائی، حفظانِ صحت کے انتظامات، ویسٹ مینجمنٹ، انفیکشن پریوینشن اینڈ کنٹرول (IPC) اقدامات، قانونی تقاضوں، مریضوں کو فراہم کی جانے والی سہولیات اور دیگر متعلقہ امور کا تفصیلی جائزہ لیا گیا۔

روزانہ جائزے کے لیے کمیٹی تشکیل

ڈپٹی کمشنر عبدالرزاق ساسولی نے صحت اور صفائی ستھرائی کے حوالے سے ایک کمیٹی تشکیل دی، جس کی سربراہی ڈسٹرکٹ ہیلتھ آفیسر ڈاکٹر عبدالحمید لہڑی کریں گے۔ اسسٹنٹ کمشنر نال، چیف آفیسر میونسپل کارپوریشن خضدار وڈیرہ محمد صالح جاموٹ اور میڈیکل سپرنٹنڈنٹ سول ہسپتال خضدار ڈاکٹر شبیر احمد بلوچ کمیٹی کے ممبران میں شامل ہیں۔ یہ کمیٹی روزانہ کی بنیاد پر صحت اور صفائی ستھرائی کا جائزہ لے گی۔

اجلاس سے خطاب میں ڈپٹی کمشنر نے کہا کہ حکومت بلوچستان عوام کو بہتر طبی سہولیات کی فراہمی پر خصوصی توجہ دے رہی ہے۔ انہوں نے کہا کہ ہماری اولین ترجیح عوام کو بہتر طبی سہولیات میسر کرنا ہے اور عوامی خدمت، انسانی ہمدردی اور فلاحی اقدامات کے فروغ کے لیے مسلسل عملی اقدامات کیے جا رہے ہیں جن کا مقصد معاشرے کے کمزور اور مستحق طبقات کو زیادہ سے زیادہ ریلیف فراہم کرنا ہے۔

ڈپٹی کمشنر نے متعلقہ پرائیویٹ اسپتالوں، کلینکس اور لیبارٹریز کے مالکان اور ان کے مجاز نمائندوں کو سختی سے ہدایت کی کہ وہ اپنا ویسٹیج مٹیریل ٹیچنگ ہسپتال خضدار میں موجود انسینیٹر میں ڈسپوز آف کریں، بصورت دیگر ان کے خلاف سخت قانونی کارروائی کی جائے گی۔

انہوں نے کہا کہ ضلعی انتظامیہ خضدار عوامی صحت، فلاح و بہبود اور دکھی انسانیت کی خدمت کے لیے ایسے اقدامات آئندہ بھی تسلسل کے ساتھ جاری رکھنے کے عزم کا اعادہ کرتی ہے۔

تصویر: بشکریہ ڈی جی پی آر بلوچستان