جامعہ تربت کے بزنس اینڈ اکنامکس کے طلبہ نے ملک کے معروف اداروں میں انٹرنشپ مکمل کر لی

تربت: جامعہ تربت کی فیکلٹی آف بزنس اینڈ اکنامکس کے طلبہ نے گرمیوں کی تعطیلات 2026 کے دوران پاکستان کے ممتاز سرکاری و نجی اداروں میں چھ ہفتوں پر مشتمل انٹرنشپ پروگرام کامیابی سے مکمل کر لیا۔

یونیورسٹی ترجمان کے مطابق وائس چانسلر پروفیسر ڈاکٹر گل حسن نے طلبہ کو عملی تربیت کے مواقع دینے پر شراکت دار اداروں کا شکریہ ادا کیا اور کہا کہ جامعہ اور صنعتی و کاروباری اداروں کے درمیان روابط کو مزید فروغ دیا جائے گا تاکہ طلبہ کو عملی تجربے اور پیشہ ورانہ مہارتوں سے آراستہ کیا جا سکے۔

انٹرنشپ کی تکمیل پر طلبہ میں اسناد تقسیم کی گئیں۔ تقریب سے شعبہ منیجمنٹ سائنسز کے چیئرمین ڈاکٹر غلام جان، شعبہ کامرس کے چیئرمین ڈاکٹر مشتاق محمد، شعبہ اکنامکس کے چیئرمین ڈاکٹر محمد یعقوب، لیکچرار امیر بخش، فوکل پرسن عطیہ اسلم اور دیگر اساتذہ نے خطاب کیا۔

مقررین نے بتایا کہ طلبہ نے اسٹیٹ بینک آف پاکستان، ڈارسن سیکیورٹیز، گوادر ڈیولپمنٹ اتھارٹی، گوادر پورٹ اتھارٹی، چمن ڈرائی فروٹس، امانا رئیلٹی گروپ، بلوچستان بورڈ آف انویسٹمنٹ اینڈ ٹریڈ اور سمیڈا سمیت مختلف تجارتی بینکوں اور معروف اداروں میں عملی تربیت حاصل کی۔ فیکلٹی ممبران نے سرکاری اور نجی اداروں سے اپیل کی کہ وہ آئندہ بھی جامعہ تربت کے طلبہ کو انٹرنشپ کے مواقع فراہم کریں۔

تصویر: بشکریہ ڈی جی پی آر بلوچستان