جامعہ تربت میں دوسری سیرت النبیؐ کانفرنس، وائس چانسلر ڈاکٹر گل حسن: سیرت ہمارے ایمان کا لازمی حصہ

تربت: جامعہ تربت کے ڈائریکٹوریٹ آف اسٹوڈنٹس افیئرز کے زیرِ اہتمام بارہ ربیع الاول کی مناسبت سے دوسری سیرت النبیؐ کانفرنس منعقد ہوئی، جس کی صدارت وائس چانسلر پروفیسر ڈاکٹر گل حسن نے کی۔ کانفرنس میں طلبہ، اساتذہ اور انتظامی عملے نے بڑی تعداد میں شرکت کی۔ آغاز تلاوتِ کلامِ پاک سے ہوا اور نظامت کے فرائض ڈائریکٹر اسٹوڈنٹ افیئرز چاکر حیدر نے انجام دیے۔

صدارتی خطاب میں ڈاکٹر گل حسن نے کہا کہ نبی کریم صلی اللہ علیہ وسلم پوری امت کے محسن ہیں اور آپؐ کی حیاتِ طیبہ تمام عالمِ انسانیت کے لیے مشعلِ راہ ہے۔ آپؐ سے محبت اور آپؐ کی سیرت کو اپنانا ہمارے ایمان کا لازمی حصہ ہے۔ انہوں نے کہا کہ نبی کریمؐ نے صلہ رحمی، حقدار کو اس کا حق دلانے اور رشتہ داری و خاندانی وابستگی کے بجائے اہلیت اور انصاف کے ساتھ فیصلہ کرنے کی سختی سے تاکید فرمائی، اور نئی نسل کو سیرتِ نبویؐ سے روشناس کرانے کے لیے جامعہ میں سیرت کانفرنسز کا تسلسل انتہائی اہم ہے۔

شعبہ پولیٹیکل سائنس کے اسسٹنٹ پروفیسر ڈاکٹر محمد سالم، مفتی ظہیر احمد اور دیگر مقررین نے سیرت النبیؐ کی روشنی میں موجودہ نظامِ تعلیم، معاشرتی عدل و انصاف اور اداروں میں میرٹ کی پاسداری پر خیالات پیش کیے۔ انہوں نے نبی کریمؐ کی اخلاقی اور معاشرتی تعلیمات کو جدید نصاب کا حصہ بنانے اور مطالعۂ سیرت کے فروغ پر زور دیتے ہوئے کہا کہ مذہبی ہم آہنگی، احترامِ انسانیت، عدم تشدد، باہمی اتحاد اور مفاہمتی کلچر پر مبنی تعلیمات کو زیادہ سے زیادہ فروغ دینا چاہیے۔

مقررین نے کہا کہ وائس چانسلر ڈاکٹر گل حسن کی قیادت میں جامعہ تربت اپنی تعلیمی ذمہ داریوں کے ساتھ سماجی، قومی اور مذہبی ذمہ داریاں بھی احسن طریقے سے نبھا رہی ہے۔ کانفرنس کے اختتام پر ملکی سلامتی، ترقی و خوشحالی، قیامِ امن اور اسوۂ حسنہ پر عمل کی توفیق کے لیے خصوصی دعا کی گئی۔

تصویر: بشکریہ ڈی جی پی آر بلوچستان