تربت: ڈپٹی کمشنر کیچ کی ہدایت، محکمہ تعلیم کی کنٹریکٹ آسامیاں بروقت مشتہر کی جائیں

تربت: ڈپٹی کمشنر کیچ یاسر اقبال دشتی سے ڈسٹرکٹ ایجوکیشن آفیسر کیچ امجد شہزاد کی سربراہی میں محکمہ تعلیم کے افسران کے وفد نے ملاقات کی، جس میں ضلع میں محکمہ تعلیم کی مجموعی صورتحال، کنٹریکٹ آسامیوں کے اشتہار، سرکاری اسکولوں کے مسائل اور بنیادی سہولیات پر تبادلہ خیال کیا گیا۔

اس موقع پر ایڈیشنل ڈپٹی کمشنر کیچ تابش علی بلوچ، اسسٹنٹ کمشنر تربت محمد حنیف کبزئی، اسسٹنٹ کمشنر بلیدہ ابوبکر میروانی، ڈسٹرکٹ آفیسر ایجوکیشن اصغر علی اور ڈی ڈی او شیرجان بلوچ سمیت دیگر افسران موجود تھے۔ امجد شہزاد نے اساتذہ و عملے کی ضروریات، دستیاب سہولیات اور انتظامی مسائل پر بریفنگ دی۔

ڈپٹی کمشنر نے کہا کہ معیاری تعلیم کی فراہمی اور نوجوانوں کے لیے روزگار کے مواقع پیدا کرنا ضلعی انتظامیہ کی اہم ترجیحات ہیں۔ انہوں نے کہا کہ بلوچستان بھر میں محکمہ تعلیم کی کنٹریکٹ آسامیوں پر بھرتیاں جاری ہیں، اس لیے کیچ میں بھی ضروری آسامیاں بروقت مشتہر کی جائیں تاکہ مقامی نوجوان میرٹ پر مستفید ہو سکیں، اور بھرتی کے تمام مراحل میں شفافیت اور میرٹ یقینی بنایا جائے۔

انہوں نے ہدایت کی کہ اسکولوں میں پانی، بجلی، صفائی، چاردیواری، فرنیچر اور دیگر بنیادی سہولیات سے متعلق مسائل کا جائزہ لے کر ترجیحی بنیادوں پر حل کیا جائے۔ ملاقات کے اختتام پر محکمہ تعلیم کے افسران نے ضلعی انتظامیہ کی کوششوں کو سراہا اور بھرپور تعاون کے عزم کا اظہار کیا۔

تصویر: بشکریہ ڈی جی پی آر بلوچستان