برطانوی فوج کے سربراہ کا انتباہ: جنگ کی صورت میں ہر شہری سے قربانی کی توقع ہوگی

لندن: برطانوی فوج کے سربراہ جنرل سر رولی واکر نے جنگ کے خطرات کے حوالے سے انتباہ جاری کر دیا ہے۔

شمالی یارکشائر میں فوجیوں سے خطاب کرتے ہوئے انہوں نے کہا کہ برطانوی عوام کو جنگ کے لیے تیار رہنے کے معاملے پر سیاسی قیادت کو عوام کے ساتھ کھل کر بات کرنا ہوگی۔

ان کا کہنا تھا کہ ہر شہری سے قربانی دینے اور ملک کے دفاع کے لیے کردار ادا کرنے کی توقع کی جائے گی۔

انہوں نے فوجیوں سے کہا کہ آپ کو اس بات کا علم نہیں ہے، لیکن قوم کو آپ کی ضرورت پڑنے والی ہے۔

جنرل رولی واکر کے مطابق سیاسی قیادت کو ملکی دفاع اور سلامتی کے لیے عوام کو قربانیاں دینے پر راضی کرنا ہوگا۔

آگاہی مہم کی اطلاعات

عالمی میڈیا رپورٹ کے مطابق برطانوی وزیراعظم اس حوالے سے آگاہی کی نئی مہم بھی شروع کریں گے۔ مہم کا مقصد لوگوں کو بحرانوں، سیلاب، خشک سالی اور جنگوں کے لیے تیار رہنے کی ترغیب دینا ہوگا۔

واضح رہے کہ گزشتہ روز ایک سروے میں 48 فیصد عوام نے کہا تھا کہ وہ جنگ میں حصہ لینے کے حامی نہیں ہیں۔