بارکھان کے ماڈل ہائی اسکول میں یومِ آزادی تقریب، ڈی سی سعید الرحمٰن کاکڑ نے طلبہ میں نقد انعامات تقسیم کیے

بارکھان: ملک بھر کی طرح ضلع بارکھان میں بھی پاکستان کا 79واں یومِ آزادی ملی جوش و جذبے سے منایا گیا۔ گورنمنٹ ماڈل ہائی اسکول بارکھان میں پروقار تقریب کے مہمانِ خصوصی ڈپٹی کمشنر سعید الرحمٰن کاکڑ تھے، جبکہ ڈسٹرکٹ ایجوکیشن آفیسر نوید لطیف، پرنسپل میر ہزار خان کھیتران، اسسٹنٹ کمشنر احسان الدین کاکڑ، ڈی ایس پی ہیڈ کوارٹر، ضلعی افسران، اساتذہ اور طلبہ بڑی تعداد میں شریک ہوئے۔

تقریب کا آغاز قومی ترانے سے ہوا، جس کے بعد طلبہ نے تلاوت، نعتِ رسولِ مقبول ﷺ، تقاریر، ملی نغموں، ٹیبلو، دوڑ، کوئز اور دیگر پروگراموں میں حصہ لیا۔

ڈپٹی کمشنر سعید الرحمٰن کاکڑ نے کہا کہ پاکستان ہمارے بزرگوں کی لازوال جدوجہد اور قربانیوں کا ثمر ہے، آزادی عظیم نعمت ہے جس کی قدر و حفاظت ہم سب کی ذمہ داری ہے۔ طلبہ تعلیم کے ساتھ نظم و ضبط، محنت، دیانت داری اور حب الوطنی کو شعار بنائیں، قائداعظم محمد علی جناحؒ اور علامہ محمد اقبالؒ کے افکار کو سامنے رکھ کر ملک کی ترقی میں کردار ادا کریں اور جدید تعلیم حاصل کر کے خدمت کے لیے خود کو تیار کریں۔ انہوں نے کہا کہ بلوچستان کے نوجوان باصلاحیت ہیں اور انہیں تعلیم اور محنت کو اپنا راستہ بنانا چاہیے۔

ڈسٹرکٹ ایجوکیشن آفیسر نوید لطیف، پرنسپل میر ہزار خان کھیتران، ڈاکٹر امیر جان اور اسسٹنٹ کمشنر احسان الدین کاکڑ نے بھی خطاب کیا۔ تقریب کے اختتام پر نمایاں کارکردگی دکھانے والے طلبہ میں ڈپٹی کمشنر اور دیگر مقررین نے نقد انعامات تقسیم کیے۔ دریں اثناء گورنمنٹ گرلز ہائی اسکول بارکھان، گرلز کالج اور مختلف پرائمری اسکولوں میں بھی 79ویں جشنِ آزادی کی تقریبات منعقد ہوئیں۔

تصویر: بشکریہ ڈی جی پی آر بلوچستان