اورماڑہ میں خواتین کی کھلی کچہری، اسسٹنٹ کمشنر ڈاکٹر ماہ نور برکت نے مسائل اور تجاویز سنیں

اورماڑہ: صوبائی حکومت بلوچستان کی عوام دوست پالیسی اور عوامی مسائل ان کی دہلیز پر حل کرنے کی ہدایات کے تحت میونسپل کمیٹی ہال اورماڑہ میں خواتین کی کھلی کچہری منعقد ہوئی جس کی صدارت اسسٹنٹ کمشنر اورماڑہ ڈاکٹر ماہ نور برکت نے کی۔

علاقے کی خواتین نے تعلیم، پینے کے صاف پانی، صحت، صفائی ستھرائی، اسکولوں میں سہولیات، آئی ٹی اور ڈیجیٹل مواقع سمیت مختلف مسائل اور تجاویز پیش کیں۔ متعلقہ افسران نے مسائل تفصیل سے سنے اور ان کے حل کے لیے ضروری اقدامات سے آگاہ کیا۔

اسسٹنٹ کمشنر نے متعلقہ محکموں کو عوامی مسائل کے بروقت ازالے اور شکایات پر مؤثر پیش رفت کی ہدایت کی۔ انہوں نے کہا کہ صوبائی حکومت کی ہدایت کے مطابق کھلی کچہریوں کا مقصد عوام، بالخصوص خواتین کو انتظامیہ تک براہِ راست رسائی دینا اور ان کے مسائل ترجیحی بنیادوں پر حل کرنا ہے۔

ان کا کہنا تھا کہ خواتین کی تعلیم، صحت، صاف پانی، بہتر تعلیمی سہولیات اور جدید ٹیکنالوجی تک رسائی حکومت کی ترجیحات میں شامل ہے اور خواتین کی مؤثر شمولیت کے بغیر پائیدار ترقی کا ہدف حاصل نہیں ہو سکتا۔ خواتین کی کھلی کچہری عوامی مسائل کے فوری ازالے، خواتین کو بااختیار بنانے اور حکومتی خدمات عوام کی دہلیز تک پہنچانے کی صوبائی حکومت کی پالیسی کا حصہ ہے۔

تصویر: بشکریہ ڈی جی پی آر بلوچستان