اورماڑہ: اسسٹنٹ کمشنر کا دکانوں پر چھاپہ، 2010 تک کی زائدالمیعاد اشیاء بڑی مقدار میں ضبط

اورماڑہ: اسسٹنٹ کمشنر ڈاکٹر ماہ نور برکت نے شہر کی مختلف مارکیٹوں میں دکانوں کا اچانک معائنہ کیا اور زائدالمیعاد و ناقابلِ استعمال اشیاء کی فروخت پر سخت برہمی اور ناراضگی کا اظہار کیا۔ انہوں نے اشیائے خورونوش سمیت روزمرہ استعمال کی اشیاء کے معیار اور میعاد کا تفصیلی جائزہ لیا۔

معائنے کے دوران متعدد دکانوں سے زائدالمیعاد اور ناقابلِ استعمال اشیاء بڑی مقدار میں برآمد کر کے ضبط کر لی گئیں، جن میں شیمپو، صابن، ہیئر آئل، باڈی لوشن اور مختلف اشیائے خورونوش شامل ہیں۔ بعض مصنوعات پر 2010، 2015 اور 2016 کی انتہائی پرانی زائدالمیعاد تاریخیں بھی درج پائی گئیں۔

اسسٹنٹ کمشنر نے واضح کیا کہ شہریوں کی صحت اور زندگی سے کھیلنے کی کسی کو اجازت نہیں دی جائے گی۔ انہوں نے متعلقہ حکام کو ہدایت کی کہ زائدالمیعاد یا غیر معیاری اشیاء فروخت کرنے والوں کے خلاف قانون کے تحت سخت اور بلاامتیاز کارروائی عمل میں لائی جائے۔

انہوں نے کہا کہ عوام کو مضرِ صحت اور زائدالمیعاد اشیاء کی فراہمی کسی صورت برداشت نہیں کی جائے گی، جبکہ خلاف ورزی کرنے والے دکانداروں کے خلاف کارروائی کے ساتھ ساتھ بازاروں میں مسلسل اور اچانک معائنوں کا سلسلہ مزید مؤثر بنایا جائے گا۔ ضلعی انتظامیہ نے واضح کیا کہ عوامی صحت کے حقوق اور محفوظ اشیاء کی فراہمی پر کوئی سمجھوتہ نہیں کیا جائے گا۔

تصویر: بشکریہ ڈی جی پی آر بلوچستان