اوتھل: 150 طالبات اسکلڈ میڈیکل ٹیکنیشن بن گئیں، کمشنر سائرہ عطاء نے ڈپلومہ سرٹیفکیٹ تقسیم کیے

اوتھل: محکمہ صحت اور لسبیلہ انسٹی ٹیوٹ آف ماڈرن سائنس کے زیرِ نگرانی ڈپلومہ سرٹیفکیٹ تقسیم کرنے کی تقریب ریسٹ ہاؤس آڈیٹوریم اوتھل میں منعقد ہوئی، جس میں کمشنر لسبیلہ ڈویژن سائرہ عطاء مہمانِ خصوصی تھیں جبکہ ڈپٹی کمشنر حمیرا بلوچ اور اسسٹنٹ کمشنر کنراج کشش چوہدری بھی شریک ہوئیں۔ تقریب میں ڈپلومہ پروگرام مکمل کرنے والی طالبات میں سرٹیفکیٹس تقسیم کیے گئے۔

پراجیکٹ کوآرڈینیٹر ڈاکٹر محمد حیات رونجھو نے بریفنگ میں بتایا کہ آواران، وڈھ، گوادر، حب اور لسبیلہ سے تعلق رکھنے والی طالبات کے چھ بیچز اس پروگرام سے مستفید ہو چکے ہیں اور اب تک 150 طالبات اسکلڈ میڈیکل ٹیکنیشن کی تربیت حاصل کر چکی ہیں۔ انہوں نے بتایا کہ ادارے نے تھیلیسیمیا سینٹر کے قیام کی منصوبہ بندی بھی کر لی ہے، جس کا مقصد مریضوں کو بہتر طبی سہولیات دینا اور صحت کی خدمات کو مزید مؤثر بنانا ہے۔

کمشنر سائرہ عطاء نے طالبات کو مبارکباد دیتے ہوئے کہا کہ فنی و پیشہ ورانہ تعلیم نوجوانوں، بالخصوص خواتین، کو بااختیار بنانے میں اہم کردار ادا کرتی ہے۔ انہوں نے محکمہ صحت اور لسبیلہ انسٹی ٹیوٹ آف ماڈرن سائنس کے اشتراک سے طالبات کو ہیلتھ کے شعبے میں ڈپلومہ کورسز کی فراہمی کو وزیر اعلیٰ بلوچستان سرفراز بگٹی کی قیادت میں حکومت کی کامیاب پالیسی قرار دیا اور کہا کہ انتظامیہ اور محکمہ صحت اس ہنرمندی پروگرام کی بھرپور حوصلہ افزائی کریں گے۔

تصویر: بشکریہ ڈی جی پی آر بلوچستان