غالب: یہ نہ تھی ہماری قسمت کہ وصال یار ہوتا

مرزا اسد اللہ بیگ خاں غالب (1797–1869)²

پس منظر

یہ غزل غالب کے دیوان کی معروف ترین غزلوں میں ہے؛ "یہ کہاں کی دوستی ہے کہ بنے ہیں دوست ناصح" اور "غم عشق گر نہ ہوتا غم روزگار ہوتا" روزمرہ گفتگو کا حصہ بن چکے ہیں¹۔ آخری اشعار میں شاعر عشق سے آگے بڑھ کر خدا کی یکتائی کا ذکر کرتا ہے، اور مقطع میں اپنے صوفیانہ کلام پر خود ہی چوٹ کرتا ہے۔

غزل

یہ نہ تھی ہماری قسمت کہ وصال یار ہوتااگر اور جیتے رہتے یہی انتظار ہوتا

ترے وعدے پر جیے ہم تو یہ جان جھوٹ جاناکہ خوشی سے مر نہ جاتے اگر اعتبار ہوتا

تری نازکی سے جانا کہ بندھا تھا عہد بوداکبھی تو نہ توڑ سکتا اگر استوار ہوتا

کوئی میرے دل سے پوچھے ترے تیر نیم کش کویہ خلش کہاں سے ہوتی جو جگر کے پار ہوتا

یہ کہاں کی دوستی ہے کہ بنے ہیں دوست ناصحکوئی چارہ ساز ہوتا کوئی غم گسار ہوتا

رگ سنگ سے ٹپکتا وہ لہو کہ پھر نہ تھمتاجسے غم سمجھ رہے ہو یہ اگر شرار ہوتا

غم اگرچہ جاں گسل ہے پہ کہاں بچیں کہ دل ہےغم عشق گر نہ ہوتا غم روزگار ہوتا

کہوں کس سے میں کہ کیا ہے شب غم بری بلا ہےمجھے کیا برا تھا مرنا اگر ایک بار ہوتا

ہوئے مر کے ہم جو رسوا ہوئے کیوں نہ غرق دریانہ کبھی جنازہ اٹھتا نہ کہیں مزار ہوتا

اسے کون دیکھ سکتا کہ یگانہ ہے وہ یکتاجو دوئی کی بو بھی ہوتی تو کہیں دو چار ہوتا

یہ مسائل تصوف یہ ترا بیان غالبؔتجھے ہم ولی سمجھتے جو نہ بادہ خوار ہوتا

مشکل الفاظ

• وصال یار: محبوب سے ملاپ
• اعتبار: بھروسا، یقین
• عہد بودا: کمزور وعدہ
• استوار: مضبوط، پکا
• تیر نیم کش: آدھا کھنچا ہوا تیر؛ ادھوری نظر
• خلش: چبھن، کسک
• ناصح: نصیحت کرنے والا
• چارہ ساز: مشکل حل کرنے والا، علاج کرنے والا
• غم گسار: دکھ بانٹنے والا
• رگ سنگ: پتھر کی رگ
• شرار: چنگاری
• جاں گسل: جان لیوا
• غم روزگار: دنیا اور روزی کی فکر
• یگانہ: بے مثال، اکیلا
• دوئی: دو ہونا، شرکت
• ولی: اللہ کا دوست، بزرگ
• مسائل تصوف: صوفیانہ موضوعات